USA ka lalaki ang gisikop sa mga otoridad human gireklamong namusil sulod sa usa ka diskohan didto sa Barangay Toril, Babak District, Island Garden City of Samal, Biyernes sa kaadlawon.
Giila ang dinakpan nga mao si Jovanie Talictic, 23, molupyo sa Purok 4, Barangay San Agustin, Babak District.
Sa report gikan Davao del Norte Police Provincial Office nasayran na nahitabo ang pagpamusil alas 12:15 sa kaadlawon sa dihang dunay usa ka padisko nga gipahigayon sa nahisgutang dapit.
Kalit matud pa nga gipusil sa suspek ang biktimang nailhan nga si Erickson Alin Lacorte molupyo sa susamang dapit gamit ang kalibre .357 revolver.
Samad pinusilan sa nagkadaiyang parte sa kalawasan ang nahiaguman sa biktima nga daling gidala sa ospital.
Ang suspek ang wa na sab makaikyas human masikop sa mga miresponding sakop sa kapulisan.
Nasakmit ngadto sa suspek ang nahisgutang pistola nga iyang gigamit sa pagpamusil nga dunay serial number 265695.
Ang suspek gitanggong dayon sulod sa selda samtang gi-imbestigahan pa sa kapulisan.
Doble ang kaso nga atubangon sa suspek sanglit gawas nga kasong frustrated murder ang gipasaka, pasakaan sab siya og kasong paglapas sa Comelec gun ban tungod sa paghupot niya og pistola.
Nasuta sab nga personal nga atraso ang nakitang motibo sa nahisgutang hitabo.
Ang nahisgutang pagpamusil maoy unang natala sa lalawigan sa Davao del Norte human gipatuman ang Comelec gun ban.. (Marvin Pineda)