GIPASALIG ni motocross patron Lou Ornopia nga himuon niyang grandiyuso ang awarding ceremony sa 2009 MS Motosuit Motocross Series.

Hinuon gitataw ni Ornopia nga wala pa siya makaseguro kon kanus-a ug asa kini mapahigayon gumikan sa daghang mga kalihukan sa pagsaulog sa Sinulog Festival.

Click here for stories and updates on the Sinulog 2010 Festival.

Inig human gyud sa Sinulog, matod ni Ornopia nga iyaha dayon kining lihukon.

Labing giatngan sa awarding mao ang pagpili kon kinsa ang mahimong 2009 Rider of the Year.

Ang lig-ong mga kandidato niini mao ang sila si Jonjon Adlawan, kinsa maoy overall winner sa expert category hasta si Juvenille Abellar, kinsa maoy hari sa Intermediate division.

Di pa man tuod mapahigayon ang awarding sa miaging tuig nga niabot og 17 ka legs, nagkanayon si Ornopia nga sugdan na sunod semana ang 1st leg sa 2010 series sa Sitio Tuburan sa bgry. Jubay, lungsod sa Liloan.

Ang kalihukan, nga giulohag “Hon. Barangay Captain Manuel Wagas Motocross Cup”, karon untang adlawa ipahigayon apan gumikan sa dili maayong panahon, hayan nauswag kini.

Gilauman nga mosalmot sa lumba ang nagkada-iyang teams sa motocross dinhi sa sugbo nga pangulohan sa Quickflight Racing ni Pepo Rubi, PSR Racing ni Jonas Adlawan, Keiz BJ Racing ni Siegfred Ornopia.

Mangapil sab ang NR Racing ni Nonoy Reluya, Motofix Racing ni Joval Abellar, BJ Pepito Racing ni Malou Pepito, Flores Racing ni Joy Flores, ug MTS Danao Racing.