NEGATIBO si pound-for-pound champion Manny Pacquiao sa paggamit og performance-enhancing drugs (PEDs) lakip na ang steroids basi sa resulta sa drug test nga gipagawas sa Nevada Sports Athletic Commission (NSAC).
Mismong si NSAC official Keith Kizer ang nipahibalo niini ngadto sa ABS-CBN North America News Bureau.
Gipahibalo sab ni Kizer nga hasta ang nipasangil kang Pacquiao nga naggamit siya’g PEDs nga si Floyd Mayweather Jr. negatibo sab ang resulta.
Ang laboratory tests ni Pacquiao gipahigayon sa iyang yutang natawhan sa General Santos City unya gipadala kini sa Malaysia samtang ang kang Mayweather gipahigayon sa Las Vegas dayon gipadala sa Arizona.
Ang resulta migawas siyam ka mga adlaw human napalpak ang negusasyon sa labing gikaintapang Pacquiao-Mayweather fight nga karonm untang Marso 13 ipahigayon.
Si Pacquiao, kinsa nakakulit sa kasayasayan isip labing unang boksidor sa kalibutan nga nakasakmit og pito ka world titles sa managlahing divisions, gikatakdang makigharong kang Ghanaian Joshua Clottey karong Marso 13 sa NFL Cowboys Stadium sa Arlington, Texas.
Samtang si Mayweather gikatahong moaway sab sa maong petsa apan wala pa’y napiliang kontra ang iyang promoter nga mao ang Golden Boys Promotions.
Sa laing bahin, molarga na karong adlawa si Pacquiao paingon sa Amerika aron sugdan ang iyang hugot nga preparasyon sa iyang pagpakigbatok kang Clottey.
Ang suod nga higala ni Pacquiao nga si Rex “Wakee” Salud nagkanayon nga dili gyud angayang luagan sa Pambansang Kamao sa Pilipinas si Clottey kay aduna gyud kini saktong ikabuga.