SA makausa pa, saulugon na usab ning harang dakbayan sa Sugbo ang tinuig nga seleb-rasyon sa Sinulog grand mardi gras.
Mahitabo na karong adlawa ang mabulukon nga streetdancing nga salmutan sa ubay-ubay nga mga contingent gikan dinhi sa ato ug gawas sa Sugbo. Hinuon, niminos karon ang mga partisipante gikan sa gawas sa Sugbo kon itandi niadtong nanglabay nga mga Sinulog.
Wa na mosalmot ang Surigao del Notre, Camiguin ug Tacloban.
Siguro gumikan ba kaha sa dako kaayo nga gasto sa pagsalmot sa Sinulog. Dili baya na basta-basta ang magpasi-ugda og usa ka contingent. Ang ila pang gasto sa pag-estar dinhi. Kon walay igong sponsor maglisod gayod kaayo. Gikan sa pribadong sektor labi pa sa business sector ang kasaga-rang suporta. Unya daghan ang mga kompaniya nga naglisod karon gumikan sa krisis.
Eleksiyon tuod karon apan gidid-an man usab ang mga pulitiko sa pagsalmot sa kalihulan labi pa og ibansiwag ang ilang mga pangalan.
PROBLEMA
Ambot kon mag-uwan-uwan pa ba. Kay sa akong pagtagik ning maong lindog kagahapon, nagtutaligsik pa man. Nag-uwan-uwan niining nangaging mga adlaw. Gani ang Pag-asa niingon man nga nag-uwan-uwan ning mosunod nga mga adlaw. Kon uwanon man, aw, medyo maguba ang kamada ug ang parada. Dili kaayo makabuylo ang mga dancer kon mag-uwan.
Kasagarang problema nga motunaw atol sa parada mao ang crowd control. Ang mga tumatan-aw dili na makontrol og mobabag na sa rota sa parada nga dili na hinuon kaayo maka-perform ang mga dancer. Maglisod intawon og control ang militar ug kadete.
Maayo lang sa sinugdanan ang crowd control pero pagka-hapon wala na kay mangaluya na ang tanan. Kapuyan na usab ang mga dancers ug mawala na ang ilang kaikag sa pagsayaw.
MAGBANTAY
Ato lang gipahimangnuan ang mga motan-aw sa grand mardi gras nga gikinahanglan nga magbantay batok sa mga dautang elemento sama sa mga mangunguot, snatcher ug mga holdupper. Puwerteng daghana na sa mga badlungon sa katilingban gikan sa laing lugar nga nituyo pag-anhi dinhi aron anhi mamiktima.
Busa aron kalikayan nga di mabiktima, mao nga magmatngon gyod.
Dili nato hatagan og higayon kining mga kolukoy sa katilingban nga mobiktima kanato. Una, dili ta magdala og dakong kuwarta.
Kanang igo lang ipalit og pagkaon. Unya dili magsul-ob og mga alahas. Ang mga cell phone di ipasaya-saya. Hinaot nga malipayon ug mabulukon ang atong pagsaulog sa kapistahan sa milagrusong bata. Pit Senyor sa tanan!
[bgnalzaro@gmanetwork.com]