GIBANABANANG niabot gyud sa 2 milyones ang mga tawo nga nisalmot ug nisaksi sa solemn procession kagahapon taliwa sa wa gyud paglurang sa uwan, matod sa kapulisan.

Gawas ning bana-bana ni Cebu City Police Director Patrocinio Comendador, iya sab nga gibutyag nga wa say mga kagubot o krimen nga nahitabo atol sa prosesyon.

Click here for stories and updates on the Sinulog 2010 Festival.

Ang pagdoble sa gidaghanon sa mga deboto nga nikuyog ug nag-atang sa kadalanan gumikan usab sa kataas na sa rota nga giagian sa procession karong tuiga.

Nasayran nga moabot sa 6.5 kilometers ang gilatas sa procession kagahapon nga may taas itandi sa naandang 5 kilometros.

Samtang gairog ang procession, nag-anam usab og kadaghan ang mga deboto nga nibalewa ra sa paghinay-kusog sa uwan.

Mga alas 2 na hinuon nakagawas sa Basilica ang karo ni Sr. Sto. Niño apan bisan niini wa mag-abot ang ulohan ug tumoy nga bahin sa procession sanglit nagsugod naman sa pag-abante ang lead pack.

Gani mga alas 3:20 nabalik na sa Basilica ang ulohan sa procession.

Taliwa sa di maayong panahon, niabot si Cardinal Vidal ug sama sa naandan maoy nibitbit sa imahen ug nitunol ngadto sa karo.

Wa hinuon mokuyog ang Cardinal sa procession.

Si Teresita Labor, taga Guadalupe, nag-antos sa pagbarog ug pagpasinguwan dala ang iyang dakong imahen sa Sto.Nino samtang nagpaabot sa karo sa balaang bata sa may Fuente Osmeña.

Matod ni Labor nga dihang duna siyay sakit sa iyang tiyan, nagtuo siyang din a gyud maluwas kay matod niya wa gyud siyay kuwartang ikapalit og tambal sanglit usa lang siya ka janitress.

Iya nalang giampo sa Sto. Niño nga kon maayo siya sa iyang sakit, kada adlaw gyud siyang mobisita sa Basilica ug di lang sa adlaw’ng Biyernes.

Ang maong panaad gihimo na ni Labor sud sa duha ka tuig ug padayon kini niyang himuon.

“Maayong lawas ra gyud akong gipangayo sa Sto. Niño ug para nako dakong milagro nga naayo ko sa akong sakit,” nagkanayon si Labor.

Samtang sa wa pa ang procession, gipahigayon usab ang reenactment sa unang misa ug bunyag sa nasod.

Gisunod kini human gipahigayon ang fluvial procession ug taliwa sa padayong pag-uwan-uwan, napuno gihapon ang pilgrim ug tibuok Basilica sa mga deboto.

Wa hinuon dayon makasugod ang misa mga alas 9 sa buntag kay nalangay ang pag-abot sa imahen ni Sr. Sto. Niño gikan sa fluvial procession human usab wa kini masugdi sa saktong oras.

Si Msgr. Cristobal Garcia nga maoy nisaulog sa misa nipasalamat sa mga paring Agustino kay sud sa 444 ka katuigan, ilang na-preserbar ang imahen ni Sto. Niño.

Gisundan dayon kini sa unang pagbunyag ug giapil usab sa pagbendisyon ang mga deboto nga nitambong sa reenactment.