GIPAKATAG karon ang mga checkpoint sa lainlaing dapit isip pagtuman sa Comelec gun ban. Ang gun ban gilusad tungod sa taliabot nga piliay sa Mayo 2010. Nabatasan na usab dinhe sa atong nasud nga matag sugod sa election campaign hangtud nga mahuman ang piliay, ilusad ang Comelec gun ban.

Gitumong kini nga mapakgang ang mga duguong hitabo nga lagmit mahimo ilabi na kun init kaayo ang piliay sa usa ka lugar.

Ubos sa maong reglamento, mga tawo gibaoran nga dili magdala og armas ug kadtong mga gahi og ulo, mag-atubang og kaso.

Karong tuiga, sukad gipahamtang ang Comelec gun ban, ubay-ubay na ang mga tawo nga nasakpan nga nagdala og armas.

Nindot ang kampanya ug dayag na lamang nga makatabang sa pagmintinar sa kalinaw ug kahusay, ilabi na sa pipila ka mga gubot nga dapit sa Mindanao.

Ang paglusad og gun ban maayong tun-an sa mga otoridad, sama sa pulis ug militar.

Unta dili lamang kay sa panahon sa eleksiyon kini ilusad apan sa tanang adlaw, semana, buwan ug tuig.

Nahimo na nga kasinatian sa mga dakbayan, sama pananglit sa siyudad sa Davao, nga sa panahon nga magpabugnaw dinhi ang pipila ka mga pulitiko ug negusiyante gikan sa ubang lugar sa Mindanao magdala ang ilang mga bodyguards og daghang tag-as nga armas.Murag makig-giyera. Dunay mga higayon nga kining armado nga mga bodyguard makatugaw sa kalinaw sa dakbayan.

Unta higpitan na sila sa kagamhanan pinaagi sa makanunayon nga pagpahamtang sa gun ban ug pagmuntar og checkpoint bisan unsang orasa sa bisan diing lugar.

Kun kinahanglanon ta ang kalinaw sa panahon sa piliay, labaw ta nga kinahanglanon kini sa tanang panahon. (ely_luciano@yahoo.com)