Comelec nabalaka sa mga hacker

MGA opisyal sa Commission on Elections (Comelec), Autonomous Region in Muslim Mindanao (Armm) mipadayag sa ilang kabalaka nga mahanaw sab ang ilang mga record sa computer gumikan sa mga hackers.

Kini human milampos ang mga hackers pagsulod sa mga websites sa nagkadaiyang ahensya sa gobyerno ug gipangguba ang mga sulod niini pinaagi sa pag-usab sa mga dagway ug litrato ingon man ang pagbutang og mga binastos nga pulong sa mga files niini.

Matud ni Comelec Armm Regional Director Attorney Rey Sumalipao nga nahadlok siyang ang mga hackers moguba sab sa word files sa ilang buhatan sama sa nahitabo sa ubang mga National Government agencies.

Gidugang ni Sumalipao nga ang ilang mga records sa labing bag-ong dokumento sa Comelec kabahin sa 2010 election, wala pa mabutang sa usa ka lig-ong software.

Aron paglikay nga di kini mahitabo, mikuha na ang ilang buhatan sa serbisyo sa mga eksperto batok sa computer hackers aron maprotektahan ang maong mga files.

Usa sa ilang gibutang mao ang pagbutang og firewalls aron di dali nga masudlan, maabli sa di-otorisadong tawo.

Lakip sa nasulod sa mga hackers nga giingong mga Indonesians ug pipila ka mga local hackers sa nasud mao ang National Disasters Coordinating Council (NDCC), Department of Health (DOH), Tesda.

Hinuon ang mga opisyales sa maong mga ahensya mipadayag nga wala'y mga sensitibong impormasyong gibutang sa mga websites nga makahatag og hulga sa nasud.

Ang kagamhanang nasyonal mihimo na og mga lakang aron masubay, masanta ang maong binuang lakip na ang pagsubay sa mga web providers ug uban pa pinaagi sa National Bureau of Investigation.

Nabalaka si Sumalipao nga basin unya ma-apektuhan ang taliabot nga piniliay. (Edgardo Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph