NAHANAW ang paglaum sa mga ginikanan sa usa ka grade six pupil nga makalampos ang ilang pinangga nga anak sanglit naligsan ug namatay kini sa alas 7:45 sa gabii niadtong Sabado didto sa El Rio Vista, Phase V, Diversion Road, Buhangin, siyudad sa Davao.

Ang biktima mao si Benjie Bentibano, 15, nagtungha sa Buhangin Elementary School ug nagpuyo sa El Rio Vista, Buhangin.

Si PO2 Joel Degamo, traffic investigator sa Buhangin Police Station, nagbutyag sa iyang spot report nga mitabok sa kalsada ang biktima niadtong orasa apan nabanggaan siya sa usa ka Fuzo Canter Truck.

Ang maong truck dunay plate number UST-782, gipanag-iyahan sa King Rubber International ug gimaneho ni Robert Placiete, 28, ulitawo, kasamtangan nga nagpuyo sa Racal Ceramic Bargain Center sa Barangay Sasa.

Giingon nga ang truck gikan sa Panacan paingon unta Barangay Maa apan paghiabot sa El Risto Vista aksidenteng nabanggaan ang biktima.

Si Placieta boluntaryong mitahan sa iyang kaugalingon didto sa Maa Police Sub-station samtang ang patay'ng lawas sa biktima gidala sa Angel Funeral Homes.

Giandam na ang kasong reckless imprudence resulting to homicide sa kapulisan aron ipasaka ngadto sa korte batok sa nakabangga nga drayber. (AD)