GITUNOL ngadto sa Criminal Investigation and Detection Group (CIDG) ang usa ka babayeng gitudlo nga illegal nga nang-recruit og mga tawong buot molangyaw sa laing nasud.
Si Evelyn Casas, 37, minyo, molupyo sa dakbayan sa Digos, nadakpan sa kapulisan sa siyudad sa General Santos Barangay San Isidro, Lagao, Biyernes.
Gihatod dayon sa kapulisan ngadto sa CIDG ang suspek niadtong Sabado, sanglit dinhi sa probinsya kini nakahimo og salaod.
Si Supt. Rodel Calo, opisyal sa CIDG, ning lalawigan nagkanayon nga adunay napundo nga warrant of arrest ang dinakpan gikan sa Regional Trial Court (RTC) Branch 20 ubos sa sala ni Judge Albert Axalan, nga gipagula niadtong Nobyembre 9, 2009.
Sumala ni Calo, "large scale illegal recruitment" maoy kasong giatubang sa dinakpan.
Naghiusa ang pwersa sa CIDG ug kapulisan sa maong dakbayan aron masikop ang suspek nga dugay ra nilang gipangita.
Apan, matod ni Calo, nga di pa nila masuta kung ubay-ubay ang mga tawong nabiktima sa maong suspek.
Istilo niini, dason sa uwahi, mao ang pag-agni og mga tawong buot makakita og trabaho didto sa laing nasud lamang kay peke diay kini.
Gumikan niini gihagit ni Calo ang mga tawong nahimong biktima sa suspek sa pagpatim-aw ngadto sa ilang buhatan aron madugangan ang pa ang kaso niini.
Hugot sab nga nagpahimangno ang CIDG sa pagtaho gilayon sa ilang buhatan ugaling mabiktima sa mga illegal recruiter. (Dondon Dinoy)