DUHA ka mga sundalo nga sakop sa ISAFP Region XI (Davao Region) ang gisikop sa kapulisan sanglit nakalapas sila Commission on Election Resolution 8714 (Comelec Gun Ban) sa alas 2:30 sa hapon niadtong Sabado.
Ang duha nasikop sa mga pulis nga nagmuntar og checkpoint duol sa Airport View, Diversion Road, Buhangin, siyudad sa Davao.
Gitanggong karon sa selda sa Davao City Police Office (DCPO) mao sila TSGT Elpedio Canillas, 53, minyo, nagpuyo sa Blk. 16, Lot 16, NHA Bangkal ug PFC Edmar Tepait, 50, minyo, ug nagpuyo sa Fatima Village, Bajada, ning siyudad.
Base sa spot report sa Buhangin Police Station, ang duha gisikop sa mga sakop sa Regional Public Safety Management Batallion (RPSMB)-Davao nga gipangulohan ni Police Inspector Junvic Nasayao ug Buhangin Police Station nga gipangulohan ni Police Chief Inspector Dionisio Abude.
Mga pulis nagmuntar og checkpoint sa maong lugar aron susihon ang mga motorista nga moagi sa Diversion Road.
Sila si Canillas ug Tepait giingon nga nagsakay og motorsiklo niadtong orasa ug gipahunong nila PO2 Randy Camado ug PO1 Jeffrey Magdirilia.
Nasiplatan sa mga pulis nga nagtakin og armas ang duha ka mga sundalo mao nga gipangitaan sila og mga papeles nga makapamatuod nga sila gihatagan og pagtugot sa Comelec.
And duha walay gikapakita sa mga pulis gawas lamang sa expire nga Mission Order (MO) sa ilang mga armas nga .45 kalibre nga pistola.
Si Canillas naghupot og pistola nga dunay serial number nga 1344630, dunay magazine nga may sulod nga pito ka buhing mga bala samtang si Tepait naghupot og pistola nga dunay serial number 1360324, dunay magazine nga may sulod nga pito ka buhing mga bala.
Tungod kay wala silay gipakita nga legal nga dokumento, gidala sila didto sa presinto sa Buhangin Police Station aron ipatala ang ilang pagkasikop dayon gibalhin didto sa selda sa DCPO.
Giandam na sa kapulisan ang kasong paglapas sa Comelec gun batok sa duha ka mga sundalo.