GIKATAKDA nang mouli si ALA boy Z “The Dream” Gorres dinhi sa nasod karong Pebrero 4, hapit tulo ka mga buwan human siya operahi sa utok sa University Medical Center sa Las Vegas, USA.

Sa taho sa www.philboxing.com, nakagawas na sa ospital si Gorres sa miaging adlaw ug gipanamilitan siya sa mga kawahi sa UMC nga seguradong magmingaw kaniya ug sa samang higayon nagmalipayon nga hingpit na siyang luwas sa makuyaw nga kahimtang.

Click here for stories and updates on the Sinulog 2010 Festival.

Samtang maghuwat sa ilang pag-uli, si Gorres ug ang iyang asawa nga si Datches temporaryo unang mopuyo sa panilamay sa usa sa mga empleyado ni Dr. Benito Calderon nga si Richard, kinsa usa sa mga sumosunod sa lumad nga taga Mandaue City.

“This will enable him to undergo rehabilitation without unnecessary inconvenience as the house is near Dr. Calderon’s clinic,” matod sa usa sa mga trainer ni Gorres nga si Tony Martin.

Nagkanayon si Datches nga makalakaw na si Gorres og pipila ka mga tikang, usa ka maayong timailhan sa iyang pagpaalim.

Gipangga gyud og maayo si Gorres sa mga empleyado sa UMC, nga kadaghanan sa mga Pinoy, nga pulos nagkausa nga mag-amot-amot aron tabangan ang pamilya ni Gorres sa bayranan sa ospital.

Gani si Datches gisuroy sa pipila ka nurses sa mga dapit sa Las Vegas aron hatagan sab kini’g gamayng lugway gikan sa mga kahasol.

Ubay-ubay gyud ang nakatabang og dako kang Gorres lakip na niini si Ana Fe Alcalen, kinsa maoy case manager sa UMC. Si Alcalen kanhi classmate sa asawa ni Martin nga si Yvonne.

Naa sab si Frank Slaughter, usa ka American boxing trainer sa University of Nevada Las Vegas (UNLV), kinsa nagpasiugda og fund raising alang kang Gorres.

Si Slaughter midala nila ni Datches, Martin, Yvonne, ug trainer Edito Villamor sa inagurasyon sa 2010 National Federation of Filipino American Associations diin gihatagan og kahigayunan si Datches nga makahangyo og hinabang alang sa iyang bana.

Giimbitar sab si Datches sa Christmas party sa Filipino Veterans Association.

Apan ang labing dako gyung natabang mao si Dr. Calderon, kinsa mao gyu’y naglihok aron maseguro ang kaluwasan ni Gorres.

Ang mga doktor ug nurses sa UMC hasta sila si Martin ug Yvonne dako sab gyud og natabang hilabi na sa pag-atiman kang Gorres.

Ang Top Rank Promotions ug Manny Pacquiao Promotions nagpadala sab og mga representante aron makaduaw kang Gorres.

Nahiaguman ni Gorres ang insidente human sa iyang unanimous decision nga kadaugan batok kang Colombian Luis Melendez niadtong Nobiyembre 13 sa Mandalay Bay Hotel & Casino’s House of Blues.

Human gianunsyo ang iyang kadaugan, nakuyapan si Gorres ug gidala dayon sa ospital.