NAGKUYOG sila si Doming ug Virgie sa pagpanglakaw niadtong gabii sa Nobiyembre 15, 1998. Nipara silag PUJ mga pasado alas 7 sa gabii, apan wa sila magtupad sa paglingkod.

Nikanaog ang babayeng tupad ni Virgie ug nipuli si Conrad, kinsa hubog kaayo niadtong higayuna. Pagkataudtaud nitugpa sa abaga ni Virgie ang ulo ni Conrad hinungdan sa kasuko sa babaye.

Click here for stories and updates on the Sinulog 2010 Festival.

Kay wa na makaaguwanta, nisalga na si Doming ug nipaila nga siya maoy bana ni Virgie. Wa sila makahibawo nga kuyog diay ni Conrad si Marvin, kinsa hubog sab. Nagkalalis silang upat, apan nihilom ra ang duha ka managhigala.

Samtang nagdagan ang sakyanan, naghunghungay ang managhigala.

Nimando dayon ang duha sa pagpahunong sa PUJ kay manaog sila.

Sa paghunong sa PUJ, kalit kaayong niibot og kutsilyo si Marvin dayon nidunggab kang Doming tumong sa dughan. Nikalit sab pag-ibot og kutsilyo si Conrad ug nitabang pagdunggab kang Doming.

Tungod sa kakalit, way nahimo si Doming sa pagsukol. Siyam ka mga samad ang nahiaguman ni Doming. Nitabang unta si Virgie sa pagsagang sa panunggab, wa siyay nahimo. Hinuon, nangasamad ang iyang mga tudlo.

Nadakpan ang mga akusado tungod sa kahubog. Ang biktima namatay sa iyang mga samad.

Samtang diha sa bilanggoan, giatake sa kasingkasing si Marvin ug namatay hinungdan nga si Conrad na lang ang nahabiling nag-atubang og kasong murder. Matod ni Conrad, di sila kaila ni Marvin.

Niangkon siyang nakasaksi sa panaglalis nila ni Doming, Virgie ug Marvin. Nakakita sab siya sa pagdunggab ni Marvin kang Doming. Ug usa lang siya sa mga pasahero nga ninggawas ug ningdagan gikan sa PUJ.

Nahibung kaayo siyang gidakop siyag apil sa traffic enforcer.

Unsaon paglusot ni Conrad kon positibo siyang gitudlo sa mga saksi,labina ni Virgie nga usa sa duha nga ningdunggab sa iyang bana? Unsa man nga kaso, kana kon guilty si Conrad, murder o homicide?Ngano man?