SAMA sa usa ka nagmilagro ang Sñr. Sto. Nino kagahapon kay dihang natapos ang misa sa Cebu City Sports Center (CCSC), kalit nga nihayag ang langit ug padayon na kining niinit sukwahi sa pipila ka adlaw nga kanunay pagbunok sa uwan.

Sayong buntag hangtod pasado alas nuybe, natagamtaman sa mga tawo nga paingon sa rota sa Sinulog grand parade ug sa CCSC ang taligsik nga sama sa bendisyon sa Sto. Niño sa kasaulogan.

Click here for stories and updates on the Sinulog 2010 Festival.

Nagkadaghan ang mga tawo nga nisaksi sa kalihokan nga niresulta na hinuon nga adunay mga partisipante sa Sinulog ang nakuyapan human sa ilang presentasyon nunot sa kainit.

Nagpadayon ang nindot nga panahon hangtod nga nisugod sa pag-presentar ang contingent gikan sa dakbayan sa Sugbo nga maoy pormal nga nisugod sa ika-30 ka tuig nga Sinulog Festival.

Karong tuiga, adunay 22 ka mga partisipante sa free interpretation category ug samang gidaghanon sa Sinulog-based category.

Niabot 40 ang ningsalmot sa float category, adunay 30 sa higante category ug 19 sa puppeteers category.

Sama sa gihapon, gidagsa ang kalihokan sa daghang mga tawo lakip na sa mga inilang mga tawo sama sa mga pulitiko ug artista.

Si Sen. Ramon “Bong” Revilla nga magpapili pag-usab sa pagka-senador sa piniliay sa Mayo uban ang iyang suod nga higala nga si Philip Salvador nisaksi sa Sinulog.