MAS nidaghan ang mga sidewalk vendor nga giagian sa Sinulog parade karong tuiga.

Mao kini ang obserbasyon ni Josefa Ylanan ang pangulo sa Office of the Building Official sa siyudad nga nisusi kagahapon sa Sinulog route.

Click here for stories and updates on the Sinulog 2010 Festival.

Lakip sa iyang gi-monitor mao ang gitukod nga mga bleachers nga gipangtukod sa Sinulog route.

Matod ni Ylanan nga subay sa iyang obserbasyon, nag-anam og kadaghan kada tuig ang mga namaligya sama sa pagkaon, ilimnon ug uban pa.

Adunay pipila ka mga vendors nga nibayad ug pwesto sa Sinulog foundation aron sila tugtan nga makapamaligya bisan sa kagamay sa pwesto apan adunay uban nga wa magbayad apan padayon nga namaligya.

Matod ni Ylanan nga dili na lang nila kini abugon, apan ilang ipaniguro nga dili lang ma-alihan ang agi-anan sa mga tawo o mga sakyanan.

Gibutyag usab ni Ylanan nga ilang gipaniguro nga luwas sa delikado ang bleachers nga gitukod kay gihiling kini sa mga sakop sa Cebu Contractors Association nga mao usab ang nagtukod sa bleachers.

Mga tinugyanan sa City Hall ang gidistino sa matag usa ka bleachers aron sa pagbantay nga dili mahinobra ang mga tawo nga mosaka sa bleachers nga gitukod.

Namatikdan usab nga adunay pipila ka mga tumatan-aw sa Sinulog ang nagbagulbol sa usa ka food chain sa Osmeña Boulevard nga nagbutang og pahibalo nga di magpagamit sa ilang CR kon di kustomer. (JFT)