WALO ka mga sakop sa usa ka pamilya ang nalandig sa tambalanan human naaksidente ang ilang gisakyang PUJ kagahapon sa hapon.

Ang aksidente nahitabo sa dan South Road Property, alas 4:00 kagahapon sa hapon.

Click here for stories and updates on the Sinulog 2010 Festival.

Tulo sa mga biktima sa aksidente mga bata nga giiila nga silang Anthony James Conje, 2-anyos; Mary Abigail Alima, 10; ug ang siyam ka buwan nga bata nga si Arve Garcia.

Apil sa mga naangol ug nakaangkon ug mga pangos giila nga silang Melba Garcia, 31; Josefina Conje, 62; Adricina Carvajal, 36; Pacita Tobalado, 67; ug Josef Cadosales, 31 anyos.

Ang mga biktima puros molupyo sa Lutopan Toledo.

Ang walo nalanding ngadto sa Cebu City Medical Center (CCMC) human nitakilid ug nibangga sa usa ka kahoy ang ilang dyip nga adunay plate no. GWV 796.

Nasayran nga gikan sa pagsaksi sa Grand Mardigras ang tibuok banay sa wala pa nahitabo ang aksidente.

Matud sa pasiunang imbestigasyon sa kapulisan pinaagi ni SPO4 Ronilo Ermac nga natangtang ang tierod-end sa manubela hinungdan nga nitakilid ang sakyanan ngadto sa iyang wala ug nibangga sa usa ka kahoy.

Saysay ni Jay Garcia, 34, usa sa mga kabanay sa mga naangol, hinay lang ang ilang padagan sa ilang gisakyan sa dihang nikalit lang ning nitakilid ug nibangga sa usa ka kahoy.

Dugang pa niya nakita niya napiit ang duha niya ka iyaan nga silang Pacita Tobalado, 67, ug ang 62-anyos nga si Josefina Conje sa dihang natuwad na ang ilang gisakyan.

Ang duha ka mga tiguwang ang nagrabehan, nakaangkon ug samad sa ilang ulo ug nagpaalim sud sa ospital. (Jona F. Reyes, USJ-R Media Intern)