ANG tinugyanan sa Sinulog Foundation Inc. (SFI) niimbargo og mga complimentary ticket nga gipamaligya ngadto sa mga mosud sa Cebu City Sports Center (CCSC) alang sa Sinulog grand parade kagahapon.

Si Cebu City Police Office (CCPO) Theft and Robbery Section (TRS) chief Michael Bastes nitunol ngadto kang SFI Executive Director Ricky Ballesteros og duha ka mga VIP complimentary ticket nga giingong gipalit ni Augusto Vinalon, molupyo sa Villagonzalo II, Barangay Tejero, dakbayan sa Sugbo sa kantidad nga P300.

Click here for stories and updates on the Sinulog 2010 Festival.

Matod ni Bastes ngadto kang Ballesteros nagduda sila sa naasoyng mga ticket hinungdan nga ilang giimbargo.

Niresulta nga si Vinalon wa gyod hinuon makasud sa CCSC kay wa siya pasudla ni Ballesteros nunot sa insidente.

Ilang nasuta nga ang naasoy mga ticket gipalit ni Vinalon sa tawo nga wa siya makaila ug kay gusto siya nga makakita sa parada pinaagi sa CCSC hinungdan nga iyang gipalit ang tiket.

Nisaysay si Vinalon nga gibalihan siyag P500 sa tawo nga nagbaligya kaniya apan gihangyo niya kinig P300 unya gitugot kini niya busa iyang gipalit.

Gipakita niya kang Ballesteros nga ang tiket gisud pa’g brown envelope nga may pangalan nga Sammy Rama unya nagtumbok kini sa pila ka tiket nga sud niini.

Sa iyang bahin, si Ballesteros nikompirmar nga ang naasoyng mga tiket gikan sa buhatan ni Cebu City Vice Mayor Mike Rama.

Nitug-an siya nga aduna silay kontra-senyas busa sayon ra kaayo nila mahibaw-an kon ang naasoyng tiket gigamit sa binuang.

Iyang gitug-an nga sa milabayng mga katuigan sa Sinulog ang mga tiket gipangkopya busa adunay nitumaw nga mga peke apan ning higayona ang orihinal na gyod nga tiket apan complimentary ang gigamit sa negusyo.

Wa na mahinayon sa pagtan-aw si Vinalon sa Sinulog Parade sud sa CCSC kay nimando si Ballesteros nga pagawson siya unya giimbargo ang iyang napalit nga tiket. (JECT)