SAMA sa ubang NBA players, misud na sab sa free agency ang Miami Heat guard veteran nga si Dwyane Wade.

Kini human gisultihan ang iyang tim nga siya mag-opt out una sa iyang kontrata.

Gitakda unta nga mokita og $16.1 million sa uwahing tuig sa kontrata sa Heat ang 11-time All-Star ug three-time NBA champion nga si Wade.

Samtang ang forward nga si Luol Deng mas gipili nga magpabilin sa South Florida.

Nauna na sab nga midesisyon si LeBron James sa Cleveland Cavaliers nga motipas sa iyang $21.6M nga kontrata.

Sa report sa ESPN.com ang four-time NBA Most Valuable Player nagdumili sa pagdawat nga magpabilin sa tim alang sa 2015-16 season ug misulod sa unrestricted free agency sugod karong ada Hulyo 1.

Apan luyo niini, nagtuo ang taga-Cleveland ug NBA nga di na moadto pa si James sa laing tim ug kini gihimo lang niya isip formality.

Sumala pa, dunay laing taho nga mopirma og balik si James sa Cavaliers.

Ang aksiyon niini nga "opt-out" maoy ikatulong higayon nga iyang gihimo sulod sa milabay nga unom ka tuig diin si James nahimong unrestricted free agent.

Bisan si Paul Pierce di na tapuson ang uwahing tuig sa iyang kontrata sa Washington Wizards ug mahimo na sab siyang free agent.