DAVAO OCCIDENTAL -- Patay nang miabot sa tambalanan ang usa ka babayeng kagawad human gipusil didto sa ilang balay sa Barangay Culaman, alas 4:30 sa hapon, Lunes.

Nailhan ang biktima nga mao si Verna Medel, minyo nga molupyo sa lugar.

Subay sa imbestigasyon sa kapulisan, gikanayon nga nagbantay sa tindahan ang biktima dihang kalit miabot ang duha ka wa mailhing mamumuno.

Matod ni Senior Police Officer 3 Cristodillo Sano sa JAS Police Station nga naigo ang biktima sa dughan sa bala sa wala pa masayring kalibre sa armas.

Paspas nga nakasibat sa lugar ang mga suspetsado mao nga wa na diha paghidangat sa kapulisan.

Gisuwayan pa pagdala ang biktima sa Tomas Lachica District Hospital apan gideklara sa mga doktor nga wa nay kinabuhi.

Nagpadayon pa ang imbestigasyon sa kapulisan aron masayran ang motibo sa krimen ug hayan masikop ang mga suspetsado. (OBD)