NADAKPAN ang usa ka bomber sa New People's Army (NPA) sa militar sa alas 2:45 sa hapon niadtong Lunes didto sa Barangay Araibo, Pantukan, Compostela Valley Province.

Si Rito Lucnod, alyas Junto, nadakpan sa mga sakop sa 28th Infantry Battalion (28IB), 10th Infantry Division sa Philippine Army human nga misulay unta sa pagpabusikad og duha ka improvised explosive device (IED) sa maong dapit.

Nasakmit sa mga sundalo gikan sa posisyon ni Lucnod ang duha ka wala pa makabuto nga IEDs uban sa mga blasting caps, triggering device ug ang 100 metros nga electric wire.

Nasayran nga ang tropa sa kagamhanan mihimo og security patrol sa maong lugar sa dihang ilang nadakpan si Lucnod nga mitago sa gulayan nga bahin sa lugar nga naggunit na og triggering device.

Gibutyag ni 28IB Commander Lieutenant Colonel Benjamin Daniel Tianco nga dugay na silang nakadawat og mga taho gikan sa nagpakabana nga sibilyan sa lugar bahin pagpangilad ug pagpanghasi sa mga rebelde.

Gidayeg ni Eastern Mindanao Command Commander Lieutenant General Aurelio Baladad ang kasundalohan nga nakadakop sa bomber sa NPA.

"Due to recoveries of these IEDs, we have again saved innocent civilians from being victims of NPA bandit's terroristic acts in the area," matod ni Baladad.

Samtang ang kapulisan sa maong lugar nagpasaka na og kasong illegal possession of explosives ug uban pang tukmang kaso batok sa dinakpan. (AD)