ATONG saluduhan ang mga organizers sa Sinulog labi pa sa Sinulog Foundation Inc., gumikan sa malampuson nga pagpahigayon sa ika-30 ka tuig nga kasaulogan sa tinuig nga mabulukong kalihukan. Kini bisan pa man sa ginagmay’ ng mga problema nga nitumaw ug ingon man ang panahon. Gihulga og uwan-uwan ang kalihukan nianang buntag pa. Apan milagro kay ni-init hangtod sa hapon apan nibundak na usab ang uwan anang pagkahapon.
Bisan pa man niini, wala gihapon mawala ang kaikag sa mga contingents ug sa mga tumatan-aw nga magpabilin diha sa kadalanan bisan uwan ug init aron lang makasaksi sa tinuig nga grand mardi gras. Nagkampat lang hinuon ang make up sa mga dancers labi pa sa mga babaye gumikan kay nangabasa man.
Puerting inita anang buntag ug udto, pagkahapon niuwan.
Apan wala gihapon kini makapakgang sa kalihukan. Busa atong pahalipayan ang tanan, apil na ang kapulisan gumikan kay malinawon ang kalihukan bisan dihay biktima sa pagpanguot.
Ang mga sundalo ug mga kadete nga nagsilbing crowd control.
Bisan pagkahapon, wala na sila makahimo sa ilang trabaho kay dili na mabangbang ang mabagang duot sa katawhan nga ni-ali na sa dalan.
WA MAKA-ARTE
Gumikan sa polisiya ni Mayor Tomas Osmeña nga walay tugutan nga mga pulitiko nga makakampaniya atol sa Sinulog, wa gayud maka-arte og salida ang mga kandidato.
Adunay pipila ka mga personalidad nga gustong magpapili og national position apan hipos kaayo sila didto sa grandstand. Atong nakit-an sila si Manny Villar, Loren Legarda, Bong Revilla ug brodcaster Rey Langit, kinsa magpapili sa pagkasenador. Apan wala gayud sila mohimo og lakang nga nisuway sa pagpangampaniya. Igo lang nanglamano ug nagkaway-kaway sa ilang mga kamot sa katawhan.
WA IDAYON
Maayo kay wala idayon sa taga City Hall ang ilang unang plano nga pasul-ubon og t-shirts ang mokuyog sa float sa City Government nga adunay marka nga SRP ‘Suya Ra ang Probinsiya’. Una kadtong higayon nga nisalmot ang City Hall sa float category. Masambugan man gud og bulok pulitika kon gipadayon pa kadto. Nasayod na gud ta kon kinsay gipadungog-dungugan niadto.
Maayo kay manimaw sila sa komentaryo sa publiko ug na-usab ang ilang huna-huna. Matod pang City Administrator Bimbo Fernandez nga wala nila gipadayon kay naminaw sila sa dili maayong reaksiyon sa katawhan. Pero pa-ukyab ra diay kadto, matod pa ni SRP Manager Nagiel Banacia.
[bgnalzaro@gmanetwork.com]