USA ka 20 anyos nga lalaki ang namatay human maaksidente ang iyang gimaneho nga motorsiklo.
Sumala pa, nadasmagan sa biktima ang likod nga bahin sa tricycle nga iyang gisundan samtang siya nagmaneho.
Ang insidente nahitabo dapit sa kanto sa Ramon Delos Cientos highway ug Rose Street, didto sa lungsod sa Bansalan, Davao del Sur, mga alas 8:30 sa gabii, Enero 17.
Si Inspector Reniel Raotraot, deputy chief of police sa Bansalan Police Station, nagsulti nga ang nabangga mao si Caster John Jay Castro, taga dalang Ilang-ilang sa lugar.
Si Castro, nagmaneho niadtong higayona sa motorsiklo nga gipanag-iyahan ni Crisologo Estremos.
Apan subay sa mga nakasaksi paspas kaayo kining nipadagan sa maong sakyanan, nakahimo pa kini sa pag-overtake sa tulo ka mga laing sakyanan.
"Na-out of balance siya kay paliko man gud ang tricycle sa Rose Street unya na-under estimate yata niya ang dalan kay kurbada man mao to naigo siya sa likod sa tricycle," paghulagway ni Raotraot.
Matod niini nga ang tricycle gipanag-iyahan ni Rey Formentera ug gimaneho ni Sixto Campaner, 31 anyos kinsa lumolupyo sa dalang Del Pilar sa lungsod.
Gikan sa siyudad sa Davao nga direksyon ang duha ka mga sakyanan dihang nahitabo ang aksidente.
Gisuwayan pa paghatod sa Zarsona Medical Clinic ang biktima apan dihang gibalhin na kini padung sa Digos Doctors Hospital didto giingong nakabsan sa iyang kinabuhi tungod sa grabeng bun-og ug samad nga nahiaguman.
Dugang ni Raotraot nga nagkasabot na ang duha ka partido kun unsay angay himuon aron matabangan ang pamilya sa biktima sa pagpahiluna sa patay'ng lawas niini.
Samtang dungan sa maong hitabo, nireklamo sab ang tagdumala sa Zarsona Medical Clinic ngadto sa buhatan sa kapulisan sanglit usa ka mag-inahan nga pasyente nila ang nisibat sa balayrunon dihang nagkapuliki ang mga doktor sa pag-atiman sa biktimang si Castro.
Subay sa taho sa kapulisan, nagdali-dali sa pagsibat gikan sa pagka-confine sa siyam ka adlaw sud sa lawak sa tambalanan ang mag-inahan.
Sila molupyo sa Sto. Ni¤o Village sa Barangay Poblacion Dos sa Bansalan.
Giingon nga nigawas kini sa ospital nga wa nagpahibawo. (Dondon Dinoy)