USA ka lalaki ang namatay human nabalintong ang iyang gisakyang motor tungod sa dangog nga dalan didto sa Barangay San Miguel, dakbayan sa Tagum, Dominggo sa hapon.

Giila ang biktima nga si Nestor Arboleras, hamtung ang panuigon, ug molupyo sa Kilometro 48, Barangay Canocotan, sa susamang siyudad.

Sa report gikan sa Traffic Section sa Tagum City Police Station nga nahitabo ang aksidente pasado alas 2:00 sa hapon.

Angkas sa usa ka motor ang biktima nga dunay plate number GC-2165 nga gidrayban sa iyang wa pa mailhing pag-umangkon, kuyog ang laing lalaki.

Samtang gisubay nila ang highway sa may Barangay San Miguel, kalit matud pa nga nabalintong ang gisakyang motor sa biktima human nawad-an og kontrol ang drayber tungod sa dangog nga dalan.

Atol sa pagkatumba nalagpot ang biktimang si Arboleras hinungdan nga nabunal siya sa sementadong dalan.

Nahiagum og grabeng pangos ug bun-og sa kalawasan ang biktima nga miresulta sa pagkatibway sa iyang kinabuhi.

Migawas sa inisyal nga pakisusi sa mga otoridad nga tungod sa dangog nga dalan dala sa nagpadayong pagbunok sa ulan, nawad-an og kontrol ang nagmaneho sa motor, resulta nga nabalinting kini.

Kapulisan padayon pa sa paghimo og dugang imbestigasyon sa hitabo. (Marvin Pineda)