Pintor gibugha

PADAYONG gisubay sa kapulisan ang posibleng anggulo sa pagpusil-patay sa usa ka pintor samtang nagsakay og traysikol alas 8:30 kagahapon sa buntag didto sa Kilometro 6, Corner Carlos P. Garcia Highway, Barangay Matina Pangi, Talomo District, siyudad sa Davao.

Ang biktima nailhan sa kapulisan nga si Alfie Egalan Barba, 23, minyo, pintor, ug nagpuyo sa Kilometro 9, Barangay Matina Pangi, ning siyudad.

Subay sa inisyal nga imbestigasyon ni Senior Police Officer 1 Daniel Fajardo ug Police Officer 3 Harold Delima, nasayran nga nagsakay lamang og traysikol ang biktima dihang gibanhigan sa riding-in-tandem.

Diha dayon namatay ang biktima kinsa nakaangkon og usa ka sa samad pinusilan sa tangkugo.

Si Davao City Police Office spokesperson Chief Inspector Milgrace Driz nagsulti nga ilang gisubay karon ang personal nga bangi nga posibleng motibo sa hitabo.

Ang patay nga lawas sa biktima anaa sa morgue sa Collado Funeral Homes sa Bangkal ning siyudad samtang gisuwat kining maong balita. (Jeepy P. Compio)