DUHA ka mga managhigala ang gitabangan og luba niadtong Domingo mga alas 8:00 sa gabii sa Barangay Bayabas ning siyudad sa Cagayan de Oro.
Igo lang nga nibisita sa ilang ig-agaw sila si Alexander Padenio, 24, ulitawo, taga Macasandig ning siyudad ug Jefred Abutan, 24, ulitawo, lumad nga taga Libona, Bukidnon.
Dihang paingon na mouli ang mga biktima giatangan kinin sa mga istambay sa maong dapit.
Sa record nga natala sa kapolisan sa Police Station 4 (PS4) sa Carmen nasayran nga samtang padulong pa lamang ang mga biktima aron magbisita sa ilang ig-agaw nga babaye nabantayn na nila ang mga istambay nga naglingkod niadtong tungora ug giingong adunay mga laing tinan-awan.
Taod-taod niini, nabantayan nga nanglakaw ang maong mga tambay.
Dihang paingon na nga muoli ang mga biktima giatangan kini sa mga istambay ug deretso nga giluba gamit ang kutsilyo.
Nasamdan si Padenio sa wala ug tuo nga bahin sa kamot.
Samtang samad dinunggaban sa walang bahin sa nawong ug tuo nga bahin sa bukton ang naangkon sa biktima.
Human sa hitabo dali nga misibat ang mga suspetsado samtang gidala ang mga biktima sa Northern Mindanao Medical Center (NMMC).
Ning panahona padayon pa sa paghimo og dugang imbestigasyon ang kapolisan samtang nagpabilin pa sa balay tambalanan ang ang duha ka maghigala nga padayong giobserbahan sa mga doktor. (SVB)