MGA usa ka milyon nga kantidad sa tseke ug moabot ngadto sa P137 mil ang nabitbit sa mga tulisan gikan sa usa ka establismento sa Capt. Vicente Roa-Ebarle St., ning siyudad sa Cagayan de Oro.
Nahitabo ang pagpanulis kagahapon mga alas 9:30 sa buntag sulod sa Honda Motorworld.
Gisaysay ni Bryan Bantilan, sales personnel sa Honda Motorworld nga unang nisulod sa establismento ang lalaki nga nagsul-ob og kolor puti nga T-shirt ug naka eye-glass.
Aduna kini dala nga bag hinungdan nga nagtuo silang kostumer labina nga pormal ang gisul-ob niini.
Kalit lang dayon nga misunod gikan sa pultahan ang usa ka lalaki nga nagsul-ob og helmet, naka jacket ug armado og kalibre .45.
Nisinggit kini ngadto sa mga empliyado nga dili molihok hinugdan nga pulos sila wala mitingog.
Ang unang lalaki ang dali nga nikuha sa kwarta nga gi-andam na sa kahera aron ideposito niadtong higayona sa banko.
Samtang nagsige gihapon sa pagpanion og pistola ang mga suspetsado hangtod nga nakagawas sa establismento ug dali nga misakay sa kolor itom nga XRM motorsiklo nga nagdala sa plaka KG-5568 o KC-5568 nga miagi sa dalan Ebarle.
Human sa pagpanulis usa pa dayon nakapangayo og tabang ang mga trabahante sa kapolisan apan nalangan tungod kay dili mao ang address nga gihatag niini.
Matud ni Bantilan nga gusto man nila nga apason ang maong motorsiklo apan wala mahinayon sa kahadlok nga sila pusilon.
Samtang ang kahera sa maong establisimento dihang nahinabi sa usa ka estasyonan sa radyo niingon nga gi-atol sa mga suspetsado ang pagkawala sa sugang dagitab ang pagsulod sa ilang establisimento. Ug sa pagbiya sa mga tulisan nisiga usab dayon ang kuryenti.
Nasayran nga ang maong mga kantidad koleksyon niadtong adlawng Biyernes.
"Koleksiyon ra to siya kay kong halin pa mas dako pa gyud unta ang nadala," butyag niini.
Ang kaso padayon pang gisunod sa kapolisan aron pag-ila sa mga tulisan. (Stephanie V. Berganio)