NANGAKABSAN sa kinabuhi ang amahan ug managg-uyab human nagsungag ang gipangsakyan nga motorsiklo niadtong Domingo mga alas 11:30 sa buntag sa Barangay Ulaliman siyudad sa El Salvador, Misamis Oriental.
Si Police Senior Inspector Willie Rebuya, hepe sa El Salvador Police Station nibutyag sa Sun.Star Superbalita nga gikan pa sa Divine Mercy Shrine ang mag-uyab nga mao sila si Julius Oco, ug Kenmor Felizarta, 22, dalaga, pulos nagpuyo sa susamang lungsod.
Pauli na ang mga biktima sakay sa ilang motorsiklo kolor itom nga nagdala og plaka 8884-KA dihang nahitabo ang insidente.
Samtang ang amahan nga si Efren Piales ug anak niini nga si Jason, 11, ang sakay usab sa motorsiklo kolor puti nga nagdala sa plaka KK-2277-38, pulos taga lungsod sa Claveria, Misamis Oriental ang paingon sa siyudad sa Iligan niadtong higayona.
Matud ni Rebuya nga nagsunod ang motorsiklo nga gisakyan sa mag-uyab sa usa la trailer truck nga nagdala sa plaka KRD-218 nga gimaneho ni Rubilyn Embeliado samtang gikatabo niini ang motorsiklo nga gisakyan sa mag-amahan.
Sa iyang bahin ni Embeliado kinsa driver sa trailer truck nga nahinabi sab sa Sun.Star Superbalita ug nakakita sa insidente niingon nga ni-overtake kaniya ang motorsiklo sa mag-uyab ug tungod sa kakusog sa dagan niini nagsungag kini sa gisakyang motorsiklo nga gisakyan sa mag-amahan.
Tungod sa kakusog sa pagkabangga nipasok ilawom satrailer truck ang mag-uyab lakip ang amahan hinungdan nga nalatayan kini sa ligid.
Napisat ang ulo ni Oco samtang nalatayan ang lawas sa amahan kinsa pulos dead on the spot niadtong tungora.
Ang uyab nga si Felizarta naabhak ang tuo nga bahin sa mata, bali ang tiil ug bun-og ang ulo ang gidala sa nakasaksi sa Northern Mindanao Medical Center (NMMC) ning siyudad sa Cagayan de Oro ug nakabsan gihapon sa kinabuhi pipila ka oras ang nilabay.
Samtang ang 11 anyos luwas na sa makuyawng kahimtang ning panahonaÿhuman bali sa tuo nga tiil ug samad sa agtang lamang ang naangkon kinsa nagpaalim pa ning panahona sa NMMC.
Si Embeliado kasamtangan gi-detained sa El Salvador Police Station samtang padayon pa sa paghimo ang kapolisan og dugang imbestigasyon.