HANGTOD kanus-a maleksyon ang tawo. Bisan sa kalamidad nga moguba sa panimalay ug molakas sa kinabuhi, nagpabilin nga nagmagahi ang tawo. Dili pa gyud tingali ta motagam aning resulta sa pagpataka og labay sa basura.
Niadtong Enero 15, gireport ni Annabelle L. Ricalde ang sitwasyon sa Bitan-ag Creek. Nagpabilin nga nahulga ang mga residenti sa Barangay Lapasan ug kasikbit nga dapit gumikan niining pagtipon-og sa basura.
Panahon sa dakong ulan, segurado ta momugna gyud og dakong baha kon dili malimpiyohan ang maong sapa.
Ang katarungan sa City Engineer's Office gigamit pa nila ang mga ekipos sa bukirang barangay hinungdan nga dili maatiman kining request sa barangay 22 ug 26 nga limpyohan ang ilang dapit.
Kon magsalig ta sa gobiyerno wala tay konkretong aksyon nga mapaabot. Dili makita nila kon unsa ka emergency ang sitwasyon hangtod nga dunay mahitabong katalagman nga usahay makamugna na gani og dakong kadaot sa mga kabtangan.
Sa akong pagpanarbaho sa Saipan sa Commonwealth of Northern Marianas Island, nakita nako ang susamang problema. Apan, nagtambayayong ang komunidad pagsulbad sa problema.
Wala kaayo magdependi ang mga tawo sa gobiyerno. Ang nahitabo mao nga nagtinabangay ang mga non-government organization, mga tunghaan, ug uban pang pribadong kompaniya sa cleanup drive.
Halos matag semana nagkadaiyang grupo ang mohimo og cleanup drive sa bisan asang dapit sa isla. Boluntaryo ang tanan. Ang ubang kompaniya nga dili makasalmot modonar og tubig ug pagkaon alang sa mga volunteer.
Nisulay ko sa pagsalmot. Among gilimpiyohan ang usa ka beach resort - gitawag og Old Man by the Sea. Layo ang maong dapit sa karsada, mobaktas pa og kapin sa usa ka kilometro. Ang maong resort paborito sa mga turista. Tungod sa gilay-on wala kaayo mamintenar ang paglimpyo.
Gihakot namo ang mga basura ug miagi mi sa lasang. Hago tuod kaayo ang maong gimbuhaton apan matawag sab nato nga rewarding kay nahimo tang kabahin sa pagpanindot ug paglimpyo sa dapit.
Nagtuo ta nga naa pa ning espiritu sa Bayanihan sa mga Filipino. Magtinabangay ug magkahiusa alang sa maayong tumong.
Atong hagiton ang tanang relihiyusong pundok, mga pribado ug publikong tunghaan, non-government organization o bisan unsang civic organization, himoon natong regular ang cleanup drive sa siyudad.