NILANDING sa balay tambalanan ang usa ka dalagita human naglaslas sa iyang pulso kagahapon mga alas 6:00 sa kadlawon sulod sa puloy-anan niini sa Upper Balulang ning siyudad sa Cagayan de Oro.
Giila ang biktima nga mao si Melanie (bansagon gipugngan) 17, residente sa susamang dapit kinsa nasapon nga wala nay panimuot ug nagkadugo na ang duha ka pulso niini.
Ang igsuon niini maoy nakakita sa biktima hinungdan sa kataranta niini ug gidali pagdala ang biktima sa Northern Mindanao Medical Center (NMMC).
Maayo na lamang dali kining matabang ug nadala sa balay tambalanan. Matud sa iguson niining si Miraflor nga apektado ang biktima sa away sa ilang mga ginikanan.
Giingong taod taod na nga wala miuli sa puloy-anan ang ilang amahan samtang ang inahan magsige nalang usab og lakaw.
Daw kung mag-abot sa balay ang magtiayon magsige og away. Ang uwahi nga gikasakit sa biktima mao ang mga hulagway sa amahan nga iyang nakita sa facebook nga daw adunay kuyog lain nga babae.
Gitouhang nasakitan kini sa nahitabo sa ilang pamilya nga daw kanhi malipayon. (SVB)