NAPALGAN na lang nga patay na ang usa ka fourth year high school nga tinun-an nga gituohang gilugos ug gipatay sa wa mailhing suspek didto sa lungsod sa Maco, Comval Province, Martes sa gabii.
Ang biktima nga taguon lang sa ngan nga si Jane, 16, molupyo sa Purok 3, Barangay Hijo, lungsod sa Maco.
Sumala pa ni Police Inspector Romeo Mausisa, hepe sa Scene of the Crime Operatives (Soco) Comval nga pasado alas 11:00 sa gabii, napalgang patay ang biktima mga 300 metros ang gilay-on gikan sa ilang panimalay.
Ang biktima gituohang gikan pa sa tunghaan sanglit nakasul-ob pa og uniporme sa dihang napalgang patay sa nahisgutang dapit.
Sa gihimong imbestigasyon, gikanayon ni Mausisa nga sa wala pa mahitabo ang insidente, gihagad matud pa ang biktima sa iyang mga classmates nga mag-internet aron mag-research kabahin sa radiation. Apan sa dihang mipauli na, giatangan ang biktima sa wa mailhing mga suspek ug gipanamastamasan una gipatay.
Ang biktima dunay mga samad sa kalawasan nga maoy hinungdan sa iyang kamatayon.
Dako ang pagtuo sa mga otoridad nga gihilabtan ang biktima sanglit wala na ang pang-ilawom niini sapot.
Kapulisan sa lungsod sa Maco mihimo na og dugang imbestigasyon sa maong hitabo. (Marvin Pineda)