NAGPABILING kritikal ang kahimtang karon sud sa balay tambalanan sa usa ka magtiayon human nabanggaan sa usa ka teen wheeler truck ang ilang gisakyang motorsiklo didto sa National Highway, Purok 1-B, Barangay Poblacion, lungsod sa Montevista, Comval Province, Lunes sa hapon.

Mga biktima mao sila si Ildefonso Dagupan, hamtung ang panuigon ug ang asawa niining si Gemma Dagupan, pulos molupyo sa Barangay Bobongon, lungsod sa Sto. Tomas, Davao del Norte.

Sa report gikan sa Comval Province Police Provincial Office nasayran nga nahitabo ang aksidente alas 2:10 sa hapon.

Sakay ang duha ka biktima sa usa ka Honda TMX nga motor nga dunay plate number 9178-LG nga gidrayban ni Ildefonso.

Samtang gisubay sa mga biktima ang national highway, nabanggaan sila sa ilang gikasugat nga ten wheeler truck nga gidrayban ni Gil James Arevalo, molupyo sa Barangay Sinubong, lungsod sa Veruela, Agusan del Sur.

Sa inisyal nga pakisusi sa mga otoridad nasuta nga nawad-an og kontrol si Arevalo hinungdan nga mitabok siya sa pikas tampi sa kalsada ug mibangga sa motor nga gisakyan sa mga biktima.

Gawas sa nahisgutang motor mibangga sab sa laing ten-wheeler truck nga iyang gikasugat nga gidrayban ni Reynaldo Garcia taga dakbayan sa Davao ang truck ni Arevalo.

Ang mga biktimang angol gidala sa ospital ug kritikal ang kahimtang karon.

Ang kapulisan sa lungsod sa Montevista mihimo na og dugang imbestigasyon sa hitabo.(Marvin Pineda)