DUL-AN P200-mil nga kantidad sa kwarta ug uban pang mga mahalong butang ang nahanaw human giransak sa gidudahang sakop sa acetylene gang ang usa ka pawnshop didto sa may Public Market, dakbayan sa Panabo, Lunes sa buntag.
Sa report gikan Panabo City Police Station nasayran nga alas 7:55 sa buntag, nadiskubrehan sa usa sa mga empleyado sa Double A Pawnshop nga giransak na ang maong pawnshop.
Nakahimo sa pagsulod sa maong establismento ang mga suspek pinaagi sa paghimo og lungag nga maoy ilang kaagian pasulod ug pagawas.
Sa inisyal nga imbestigasyon sa mga otoridad nasuta nga usa ka lungag ang nakit-an sa likod sa nahisgutang patigayon nga maoy gituohang giagian sa mga suspek aron sila makasulod.
Duol sa nahisgutang lungag mao ang usa ka stall nga gipanag-iyahan sa usa ka Agapito Lebodesos.
Gikataho nga giabangan sa usa ka babaye uban ang laing duha ka wa pa mailhing mga lalaki ang nahisgutang stall nga gipanag-iyahan ni Lebedesos.
Sa pagsusi sa mga otoridad nasuta nga natangag sa mga suspek ang kwarta sa vault balor P200.000.00 ug uban pang mga mahalon nga butang.
Migamit matud pa og acetylene ang mga suspek aron maguba ang vault.
Kapulisan sa siyudad sa Panabo padayon nga naniid sa mga tawong posibleng mihimo sa krimen.
Gipangita na sab ang duha ka lalaki ug usa ka babaye nga mi-abang sa usa ka stall likod sa nahisgutang pawnshop sa pamasin nga makahatag sila og katin-awan sa nahitabo.(Marvin Pineda)