USA ka magtiayon nangamatay human gisungag sa dakong truck didto sa probinsiya sa Maguindanao.

Mga biktima giila sa kapulisan nga sila si Pindatun Mantuc ug ang asawa niini nga si Limbang, ug mga molupyo sa siyudad sa Cotabato.

Sa report nga nakuha gikan sa Maguindanao Police Provincial Office, nasayran nga banda 1:40 sa hapon, Enero 18, nahitabo ang aksidente.

Sakay ang mga biktima sa usa ka XRM nga motorsiklo gikan sa ilang pinuy-anan paingon unta sa Esperanza, Sultan Kudarat Province aron motambong sa kasal sa ilang paryente.

Apan pag-abot nila sa likuon nga bahin sa kalsada sa sitio Gubat, barangay Makir, Datu Odin Sinsuat natagbuan nila ang dumptruck nga kusog kaayo ang dagan.

Sigun sa mga nakasaksi, ang trak mi-overtake pa sa laing sakyanan.

Tungod kay wa na makontrol sa drayber ang manobela maayo gyud kaayong pagkasungag niini sa motorsiklo nga gisakyan sa magtiayon.

Nilagpot sa kilid sa kalsada ang mga biktima samtang ang ilang gisakyan nga motorsiklo misilaob dihang mi-awas ang gasolina.

Mga samaron dali nga gisapupo sa mga sibilyan ug gidala sa Cotabato Regional and Medical Center.

Apan gideklara sa mga doktor nga 'dead on arrival' ang duha tungod sa grabeng mga samad, bali sa lawas ug miliki pa gyud ang ulo sa mga biktima nga nabunal sa sementadong kalsada.

Gibiyaan sab sa wala mailhing drayber ang iyang gimanehong drumptruck pipila ka metros ang gilay-on sa lugar sa aksidente.

Gipahayag ni Maguindanao Police Provincial Director Senior Superintendent Alex Linesses nga ila na nailhan ang tag-iya sa dumptruck. Giandam na ang kaso batok sa drayber. (Edgardo Fuerzas)