UNOM ka mga lalaki ang midangat sa tambalanan human sila giusa-usa og pusil sa nagkarambola nga mga sakop sa wala mailhing sakop sa gang sa alas 4:15 sa kaadlawon kagahapon didto sa Kilometro 14, Barangay Panacan, siyudad sa Davao.
Base sa rekord sa Davao Medical Center (DMC), mga biktima giila nga sila si Mark Vincent (bansagon gitago kay menor), 14, nagpuyo sa Kilometro 11, Barangay Sasa; Jayhan (bansagon gitago), 15, nagpuyo sa Do¤a Salud Subdivision; Jeffrey Santos, 23, nagpuyo sa Doña Salud Subdivision; Alan Duran, 18, nagpuyo sa Kilometro 12, Barangay Sasa; Roger Flores, 19, Kilometro 11, Barangay Sasa ug Jomar Cortez, 23, nagpuyo sa Doña Salud, Barangay Sasa.
Si Yanong naigo sa iyang pus-on, si Pestanias naigo sa iyang walang paa, si Santos naigo sa iyang tuong tiil, si Duran naigo sa iyang walang paa, si Flores naigo sa iyang walang kilid ug si Cortez naigo sa iyang tuong tiil.
Ang spot report sa Sasa Police Station nagbutyag nga gikan ang mga biktima sa Panacan Relocation ug dihang miabot sila sa Kilometro 14 ilang nakita nga dunay mga batan-on nga
nag-riot sa maong lugar.
Wala madugay, suma sa taho, giatangan sila sa usa ka alyas Bodjak ug walay daghang pangutana gipamusil sila gamit ang wala matino nga kalibre sa armas.
Human sa maong insidente, daling mibiya ang suspetsado samtang ang mga kauban niini midagan paingon sa wala na masayri nga lugar.
Gipangita na sa kapulisan ang suspetsado arong masikop ug pasakaan og kaso ngadto sa korte.
Bisan hugot nga gipatuman sa kapulisan ang Commission on Elections gun ban, apan daghan gihapon ang nagdala og armas nga wala masikop
sa kapulisan mao nga dunay gipamusil dinhi sa siyudad.
"As far as our record is concerned, ang ginamit sa mga suspects ay iyong mga improvised gun na tinatawag na 'sumpak'. But still they are violating the Comelec gun ban. Rest assured, we will file a case against them for violating Comelec Resolution 8714," suma ni Davao City Police Office officer-in-charge Police Senior Superintendent Rene Aspera dihang gipakisayran sa mga tigabalita kagahapon sa buntag.(AD)