GIPADAYAG ni Sugar Shane Mosley nga mouyon siya bisan unsang adlawa siya kuhaan og blood test, nga maoy numero unong isyu hinungdang napalpak ang negusasyon sa gikaintapan untang engkuwentro nila ni pound-for-pound champion Manny Pacquiao ug Floyd Mayweather Jr.

Nihatag og komentaryo si Mosley kabahin sa blood test dihang niamag ang poruhan nga siya maoy mahimong kontra alang sa sunod nga tahas ni Mayweather.

Click here for stories and updates on the Sinulog 2010 Festival.

Gipasabot ni Mosley nga dili siya makasulti nga adunay gigamit nga bisan unsang Enhanching-Performance Drugs (PEDs) si Pacquiao apan ang pagbalibad niini sa sugyot ni Mayweather nakahatag og pagduda.

“I’m not going to say Pacquiao is doing anything, but he is a little questionable, just a little bit,” matod ni Mosley sa interbyu sa www.boxingtalk.net.

Dugang ni Mosley nga bisag mosugyot si Mayweather nga kada adlaw ang blood testing, mosugot gihapon siya niini.

“They could do a test everyday if they want. He could sit there and watch them draw the blood and take the piss every single day. There’s nothing in my veins, I’m just naturally a strong motherf**ker! I’m naturally strong. I’m just strong period.

You could take a drug test any day of the week,” dugang ni Mosley.

Miamag ang Mayweather-Mosley fight human miatras si Andre Berto sa iyang pagpakig-away kang Mosley nga gikatakda unta karong Enero 30.

Si Berto mirason nga ang nahitabong linog sa Haiti, nga mikalas og linibong mga kinabuhi, mao ang hinungdan sa iyang pag-atras sa away.

Gipasabot ni Berto nga tungod sa nahitabo sa Haiti, dili gyud siya makaensayo og insakto alang sa labing dako unta niyang away. .

Ang ginikanan ni Berto lumad nga taga Haiti diin daghan siya’g mga paryente sa maong nasod. Hinuon si Berto natawo sa Miami, USA apan nakarepresentar sa Haiti sa Athens Olympics.

“As a result of this disaster, I am mentally and physically exhausted and therefore I have no choice but to withdraw from my bout,” batbat ni Berto sa interbyu sa AP.

Sa pag-atras ni Berto, si Golden Boy Promotions promoter Richard Schaefer nga iya dayong gilihok ang Mayweather-Mosley nga gibanabanang ipahigayon karong Mayo 1.

Gipasabot ni Schaefer nga dako ang kahigayunan nga madayon kining away kay parehong nipadayag og interes ang duha ka mga boksidor, nga pulos sakop sa GBP.

“I’m going to do whatever I can to pull it off. I’m cautiously optimistic we can put something together. It would be a great fight, a long anticipated fight,” matod ni Schaefer.

Si Mayweather taodtaod na sab nga nangita’g dekalidad nga kontra human napalpak ang negusasyon sa ilaha untang away ni Pacquiao karong Marso 13. Si Pacquiao nakakita dayon og laing kontra, si Joshua Clottey.

“Mayweather is interested and so, of course, is Shane. Now it’s a matter of negotiating the right deal structure that makes everyone happy,” dugang ni Schaefer.