MINUBO sa traditional politician (tradpo)l. Ang mga tradpol maoy nakadaot sa sistema sa atong pulitika. Maoy nakanudnod kanato sa kalisod nga atong natagamtaman.
Mga pulitiko kini sila nga baga pa sa plastik ang nawong. Maayo kaayong mogakos, mohangop ug molamano sa mga tawo. Dako kaayong tigpakaaron-ingnon.
Di mobiya sa lingkuranan sa gahom. Buot molungtad. Molungtad gyud tungod sa tulo ka mga G: gold, guns ug goons. Duna pa ganiy private army.
Usa lang ka mandar, materorismo dayon ang mga botante. Hugaon, pug-son pinaagi sa giwangki nga mga armas. Kawaton pa ang mga ballot boxes.
Daghan ang mga hitabo sa pag-patay. Di gyud masabit ang amo nga tradpol. Kay daghan mag kuwarta pagpalit sa hustisya. Apan kon masaker na madakpan usahay sama sa mga Ampatuan sa Cotabato.
Kining maong mga pulitiko ampay kaayo sa mga infrastructure. Kay dako man silag komisiyon sa pagbuhat og dalan, skywalk, sports center, fly-over, taytayan ug bi-san unsa. Top priority ni nila.
Ang buhing timaan sa ilang pagka pulitiko mao ang pagka kurakot. Aron magpuyo nga way mailiw: palasyong pinuy-anan, luhong mga kotse, babaye, ug uban pa.
Kon katapusan na sa ilang termino, ang asawa o anak dayon ang papulihon. Tukuron ang dinastiya aron iya gihapon ang gahom.
Apan duna bayay eksipsiyon sa mga tradpol. Kadtong di hangol og gahom. Kadtong gipatigbabaw ang pagsilbi sa katawhan kay sa kaugalingong interes.
Kadtong mga matinud-anon sa ilang katungdanan. Apan talagsaon ra ni sila. Nagkahanaw na ang ilang tribu.