GIPUKAW ang Sugbo sa masulub-ong taho kagahapon sa buntag tungod sa kalit nga pagtaliwan sa laing kinabuhi sa garbo sa mga Sugboanon, Press Secretary Cerge Remonde.

Usa si Remonde sa pipila ka mga Sugboanon nga nikulit og ngan sa pulitika sa nasod ug naghupot sa taas nga posisyon isip Press Secretary - sensitibong posisyon sa administrasyon ni Pres. Gloria Macapagal Arroyo nga gihamok sa daghang kontrobersya.

Click here for stories and updates on the Sinulog 2010 Festival.

Bisan sa iyang katungdanan diha sa ka-gamhanan, si Remonde gitahod gihapon sa mga kaatbang nga kampo sa pulitika tungod sa iyang maayong pagkatubag sa mga isyu ug di makapasakit og tawo.

Dihay higayon nga gisaway siya sa pipila gikan sa ‘imperial Manila’ tungod sa iyang Bisaya ug tuno sa pagsulti apan gibaliwa niya kini. Nipakita hinuon sa kamaayo ug kamatinud-anon sa trabaho hangtod sa iyang kamatayon.

Karon nga si Remonde nga nibiya na sa kalibotan sa makasasala, mahinumdoman siya sa iyang maayong mga kabilin labi na sa mga Bisaya ug mga kabus - puno sa paglaom.

Nigraduwar siya nga honor sa University of the Visayas (UV) taliwala sa kalisod ug nagsugod isip yanong kawani hangtod nga nahimong opisyal sa nagkalainlaing buhatan nga pribado ug publiko. Tinahod nga brodkaster, magsusuwat ug usa sa mga haligi sa media sa Sugbo. Nakadawat og mga pasidungog gikan sa nagkalainlaing grupo. Labaw sa tanan, relihiyuso ug deboto ni Sr. Sto. Niño.

Anugon apan, wa kitay gahom sa pagpugong sa tawag sa Makagagahom. Kanimo, Cerge Remonde, salamat sa maayong kabilin.