GIPANGHIMAKAK ni Talisay City Administrator Richel Bacaltos ang pangangkon sa mga barangay kapitan nga tua mosuporta sa kandidatura ni Bise Mayor Aberdovey Belleza nga gitangtangan sab sila og mga quota sa mga job order.

Si Bacaltos nipadala og text message sa Sun.Star Superbalita nga nagpahibawo nga way kapitan nga gitangtangan sa ilang tagurha ka mga quota.

Click here for stories and updates on the Sinulog 2010 Festival.

“Gi-renew naman nato tanang mga job order sa mga kapitan.So dili tinuod nga gitaktak sila nato. Gitagaan nato sila og punch cards starting the other week pa,”suma sa text message ni Bacaltos.

Gipasabot sab ni Bacaltos nga desisyon sa grupo sa administrasyon nga tangtangan sa iyang 20 ka quota si Belleza human kini nibiya ug nitapon sa Liberal Party isip opisyal nga kandidato pagka bise mayor.

Matod ni Bacaltos nga ang paghatag kaniadto ni Belleza og 20 ka quota usa ka privilege.

Sayo niini, si Belleza nihulagway nga harassment ang gihimo sa administrasyon pagtangtang sa 20 ka mga job order nga iyang gipatrabaho sa City Hall.

Apan mga kapitan nga dayag nga nisuporta kang Belleza nanumbong sab nga lakip ang ilang mga quota gitangtang sab.

Kasaligang tinubdan nagbutyag nga ang mga kapitan gipasaligan nga mabalik ang ilang tagurha ka quota kon mobali ang ilang suporta ngadto ni Bise Mayor Alan Bucao inay adto kang Belleza.

Ang gihimo sa mga kapitan nagsanong-sanong hinungdan nga nabalik ang ilang mga gipatrabaho sa City Hall, matod sa tinubdan. (VLM)