MIABOT na og unom ang namatay human nibangga ang usa ka multicab ngadto sa Isuzu Forward wing van sa Barangay Kanyuko, lungsod sa Dumanjug, habagatang Sugbo, niadtong Lunes sa miaging semana.
Si P/Sr. Insp. Gilfred Baroman, hepe sa Dumanjug Police Station, nikompirmar nga nakabsan sa kinabuhi ang 3-anyos nga si Quill Avenry Alpuerto sa Vicente Sotto Memorial Medical Center (VSMMC) niadtong Miyerkules.
Si Quill ang nag-birthday diin gisaulog kini sa ilang pamilya pinaagi sa pagpangaligo sa Sayaw Beach sa lungsod sa Barili sa wala pa nibangga ang ilang gisakyan nga multicab ngqadto sa wing van.
Samtang wa pasakai og kaso ang drayber sa multicab nga si Saulo Quirante, apohan ni Quill.
Matod ni Baroman, mga anak ug mga apo ni Saulo ang nangamatay.
“Matod sa piskal, kon dili mo-file ang direct complainant, way mahitabo nga kaso,” dugang sa hepe sa kapulisan sa Dumanjug.
Sa unom nga nangamatay, duha niini ang mga anak ni Saulo nga sila si Jennifer Lopez, 28; ug Mary Ann Quirante, 27.
Samtang ang upat kay iyang mga apo nga sila si Quill, Mark Quirante, 10; Oliver Lopez, 9; ug Harvey Lopez, 4.
Sa pagkutlo ning balita, sumala ni Baroman, wala pa malubong ang nangamatay. (SCG)