Paspas ang withdrawal tungod sa eleksiyon: BSP

PASPAS ang withdrawal sa tag P100 ug paubos nga mga kwarta sa mga banko karong panahon nga naghinangat ang barangay ug Sangguniang Kabataan (SK) elections, sumala sa Bangko Sentral ng Pilipinas (BSP), base sa gipahibawo sa mga banko.

Sumala ni Anna Clara Oville, manager for cash sa BSP Cebu, nabantayan sa mga banko nga paspas ang withdrawals sa tag P100, P50, ug paubos.

Apan, dili makasulti si BSP Cebu Regional Director Leonides Sumbi kon ang kapaspas sa withdrawal gumikan ba sa mga katuyoan sa eleksyon sama sa vote buying.

Apan siya nakaseguro nga manggawas ang mini nga mga kwarta karong panahon sa ting-eleksyon.

“That is why you should be very vigilant. Kani sad modawat og kwarta ba for whatever purpose, tan-awa sad ninyo nga sakto ang gihatag sa inyoha,” awhag ni Sumbi sa publiko atol sa press conference sa BSP Cebu kagahapon.

Siya nipahinumdom nga aron mailhan kon peke o tinuod ang usa ka kwarta nga de papel sa lainlaing kantidad sa New Generation Currency (NGC), hikapon lang ang Republika ng Pilipinas sa ibabaw sa kwarta diin maklaro ang bulto nga pagka imprinta.

Siya niangkon nga lisod kini mabati kon lata na ang kwartang de papel.

Si Christine Tan, deputy director sa BSP Cebu, niingon nga dili sila modawat og kwarta nga papel nga ideposito sa mga banko ngadto nila kon dunay stickers ug wire staples.

“Because we received a lot of that in the past years although the last time, we already gave that announcement,” dugang ni Tan.

Si Sumbi niingon ang pagbutang og sticker, pagsuwat og letra sa kwarta, ug pagbutang og wire staples kay illegal ug kini kalapasan sa Presidential Decree No. 247.

Ubos sa maong balaod, ang makalapas makonbikto, multahan og dili molabaw sa P20,000 o pagkapriso nga dili molapas sa lima ka tuig. (SCG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph