LUYO sa unang pagpamagahi ni Pangulong Rodrigo Duterte sa pagpirma sa executive order labot end of contract (endo) scheme, wa damha sa mga Pinoy nga mopirma ang pangulo sa kamanduan nga magtapos sa illegal contractualization ug maghatag seguridad sa pamuo kagahapon.
"I remain firm in my commitment to put an end to 'endo' and illegal contractualization," suma ni Pangulong Duterte sa iyang pagpamulong sa Cebu atol sa Labor Day kagahapon.
Ang pangulo nagkanayon nga ang EO magdili sa illegal contracting o subcontracting o undertaking nga magsalikway sa katungod sa mamumuo labot seguridad sa panarbaho.
"Security of tenure refers to the right of employees not to be dismissed or removed without just and authorized cause and observance of procedural due process pursuant with the Constitution and Labor Code," sulti sa pangulo.
Gipasabot sa pangulo nga iyang gobyerno di mohunong sa paningkamot nga maghatag sa matag mamumuo og maayong trabaho.
Sanglit ang gipagawas sa pangulo usa lamang ka executive order, iyang giawhag ang Kongreso nga amendahan ang Labor Code.
"I can only implement but if there are things that need to be corrected, modified to suit the needs or the demand of time... We have to amend or correct or recommend revision or revisit the laws," pahayag sa pangulo.
Husto ang pangulo nga angay amendahan ang Labor Code aron hingpit nga mawagtang ang kontraktuwalisasyon.
Tungod kay ang EO sa pangulo nagtumbok lamang sa illegal contractualization, nagpasabot lamang kini nga wa pa gihapoy kasegurohan sa panarbaho ang mga mamumuo.
Sa akong nakita, bisan pa man nga dunay EO nga gipaguwa ang pangulo, magpabilin gihapon ang end of contract scheme sa nasud sanglit mahadlok man ang mga kompanya nga maregular sa trabaho ang usa ka empleyado kay dako ang mahatag nilang mga benepisyo.
Dugay na kini nga paagi sa mga dagko nga kompanya (ilabi na mga malls) diin di na paabuton sa unom ka buwan ang empleyado, tapuson na ang ilang kontrata, ug pabalikon lang sa trabaho human makapahulay sud sa duha ka semana.
Ug kini ra ba nga mga negusyante maoy dagko nga funders sa mga politiko sa atong nasud.
Nan, karon, kon utangan ang atong mga politiko sa mga negusyante, duna kaha silay bayag nga moputol sa end of contract nga dugay nang praktis sa mga negusyante?