DUHA ray posibling sangpotan kon ipagawas sa Philippine Drug Enforcement Agency (PDEA) ang pangalan sa mga barangay official nga naa sa drug watchlist.
Una, kon tinuod nga nalambigit kining pipila ka mga barangay official, nan, kinahanglan mohimog paagi ang gobiyerno nga mahunong kining mga opisyal sa ilang illegal nga kalihukan.
Dili nato pasagdan nga mabutang pa sila sa puwesto pagbalik. Ug di sab nato paaboton nga makapadayon sila sa ilang tinguha nga pagpapili sa umaabot nga eleksiyon.
Kon nuntan nato ang panghunahuna nga maapektohan ilang kandidatora kon ugaling mabaniog ilang pangalan nga naa sa drug watchlist, lisod kana pamaatud-an ug tuohan. Ngano man?
Daghang mga mobanti nga mahimong mahaylo gihapon sa ilang pasalig o kuwarta.
Busa, dili garantiya nga mawa ang impluwensiya niining mga barangay official nga nalambigit sa drugas hangtod nga masikop, mapasakaan og kaso ug maibot sila sa ilang puwesto.
Ika-duha, kadtong naapil sa drug watchlist apan dili tinuod nga nalambigit sa maong illegal nga kalihukan, nan, dili sila angay mabalaka.
Kon limpiyo imong pagkatawo, bisan sa daghang mga pagdaot, pagsayaw ug pagkontra, mogawas gyud ang tinuod nimong kolor.
Nasayod ang katawhan sa barangay kon kinsa ka ug dili na kinahanglan dektahan pa o papakitaan sila og lista aron motuo nga ikaw naghimo sa maong kahiwian.
Dili angay ikahadlok sa barangay official kon ugaling sayop ang pagpakatap sa ilang pangalan sa drug watchlist. Hinuon atubangon nila kini ug himoon nga usa ka dakong oportunidad sa pagpakita sa ilang kaisog pagpuhag niining problema sa illegal nga drugas sa ilang barangay, kana kon tinuod nga wa silay kasayuran sa maong kalihukan.
Kining nag-ong-ong nga watchlist sa PDEA mahimong makadaot o makapadaog sa kandidatora sa nagpapili nga opisyal sa barangay karong umaabot nga eleksiyon.
Ipagawas man o dili sa PDEA, nasayod ta nga wala malilong sa tagsa-tagsa ka mga barangay ang kalihukan sa ilang kapitan o mga konsehal.
Ang listahan dili garantiya nga mahunong ug matipi kining mga tawo nga apil sa negosyo sa drugas.
Timan-i bisan unsa ka dako sa patigayon kon walay customer dili kana mahimong malamposon.
Busa, ang kinabag-an sa katawhan mao gihapon ang labing gamhanan nga makapaundang sa kahiwian ug makabutang og tarong, ligdong nga opisyal sa barangay.
Hinuon, hangpon nato kining lakang sa PDEA pagpagawas aning drug watchlist aron magiyahan ang katawhan.
Kadtong apil aning sindikato sa drugas sa barangay, nasayod na sila nga gamay nalang ilang panahon ug mahimong mabisto mabisto na ilang madgik o matipi na sila sa dayon.
Atong himoon nga ehemplo si Barangay Chairman Jaime Frias II sa Barangay 23. Sundon nato iyang programa ug kampaniya batok sa illegal nga drugas - may listahan man o wala gikan sa PDEA ug sa ubang ahensiya sa gobiyenrno.