GIPAHIGAYON ang random drug test ngadto sa mga personahe sa Office of the City Building Official (OBO) niadtong Lunes sa hapon sulod sa ilang buhatan nga anaa sa City Hall.
Nasayran nga aduna’y 69 ka mga personahe ang maong buhatan ug duha lamang niini ang wala ma-drug test.
Sa pakighinabi kang Architect Maria Concepcion Alcantara, head sa OBO, gibutyag niini nga nagla-om siya nga walay magpositibo sa gihimong drug test ug nagtuo usab kini nga malampuson ang pagpahigayon niini kay wala man kini nakita nga mga kadudahan sa iyang mga personahe.
“Ako hopeful man pud ko kay makita man nako akong mga sakop, lahi man gud na sila’g mga lihok lihok kung, so far hopeful gyud ko nga wala unta , wala gyud unta nakasinati man ko sa ilang mga pagtrabaho diri, so pag-anhi nila dinhi wala may reaction nga nabalaka, nagpasumangil,” pahayag ni Alcantara.
Gidugang pa niini nga sa 69 ka mga personahe duha niini ang wala maka pa drug test gumikan na usab sa balido nga rason diin ang usa niini ang nag emergency leave kay anaa sa hospital ang anak samtang ang usa ang wala gayud mismo nakuhaan sa specimen ug balikan lang kini sa tinugyanan sa Philippine Drug Enforcement Agency (PDEA).
“Sa ilang gi-conduct sa amo nga drug test isa ra ang wala matiwas wala man ko kabalo sa ilang mga balatian kay gamay ra kaayo ang specimen nga na collect, nagtry man siya,” pahayag ni Alcantara.
Gidugang pa usab niini nga naglaom gayud kini nga magnegatibo ang tanan nga personahe.
“Naa mi 69 tanan, ang isa nag leave ang isa dayon gamay ra kaayo nga ila raman daw balikan kay di man gud ma lugos, hopeful ko kay di man nato matag-an kay sila raman sa PDEA, hopeful gyud ko nga negative tanan ang result,” dugang pahayag niini.
Sa pagkakaron gi-paabot pa ang mamahimong resulta sa maong gipahigayong surprised drug test. Ang buhatan sa OBO ang ikatulo nga gipahigayonan og drug test sa susama nga adlaw.