BISAN kon susama ra og color ang bag-ong mga sinsiyo nga gipakatap karon sa sirkulasyon, di angay mabalaka ang publiko sa pag-ila niini, sumala sa mga opisyal sa Bangko Sentral ng Pilipinas.
Si Atty. Leonides Sumbi, regional director sa BSP Cebu regional office, nipasabot nga bisan sa paghikap lang, mahibaw-an na ang kalahian sa matag sinsiyo, labi na kon kini tan-awon.
“So, there’s no reason for us to get confuse,” sumala sa director.
Si Hazel Cultura, bank officer II sa BSP Cebu, niingon nga pinaagi sa tactile familiarization kon paghikap sa sinsiyo labi na sa isig ka kilid, matabangan ang mga tawo nga dunay kakulian sa panan-aw nga mahibawo sa lainlaing balor sa sinsiyo.
“Kay ang kwarta nato di man gud gihimo lang para lang sa makakita. So, we have to remember we nga na gyud tay mga visually impaired persons,” dugang niya.
Ang mga opisyal sa BSP Cebu nipakita ngadto sa mga tigbalita sa bag-ong P10, P5, P1, P0.25, P0.05 ug P0.01 denominations ug ang tagsatagsa ka kalahian sa matag usa.
Si Sumbi nibutyag nga gitagitagi ang pag-apudapod sa bag-ong mga sinsiyo sa tulo ka regional offices ug 19 ka mga sanga sa BSP sa tibuok nasod.
Si Anna Clara Oville, manager for cash sa BSP Cebu, niingon nga dili pa daghan ang supply sa mga sinsiyo, apan naninguha sila nga maangay ang pag-apud-apod sa tanang mga banko nga mao usab ang mo-apud-apod ngadto sa ilang mga kliyente.
Dinhi sa Sugbo, kinatibuk-ang P21,613,250 nga balor sa bag-ong mga sinsiyo ang giapudapod sa mga banko: P12 milyones sa tag P10, 1,000 ka bags (1,200 kabuok sa matag bag); P7.5 milyones sa tag 5, 1,000 ka bags (1,500 kabuok matag bag); P2 milyones sa tag P1, 1,000 bags (2,000 kabuok sa matag bag); P63,750 sa tag 25 sentabos, 85 ka bags (3,000 kabuok sa matag bag); P45,000 sa tag 5 sentabos, 180 ka bags (5,000 kabuok sa matag bag; ug P4,500 sa tag usa ka dako, 90 ka bags (5,000 kabuok sa matag bag).
Ang BSP nagsugod og pakatap sa bag-ong mga sinsiyo o gitawag og New Generation Currency (NGC) niadtong Marso ning tuiga.
Apan ang grand launching niini himuon sa Hulyo atol sa anibersaryo sa BSP.
Unang napagawas ang bag-ong P5 niadtong Nobiyembre sa miaging tuig agi og paghandum sa ika-154 nga adlawng natawhan sa bayaning si Andres Bonifacio kansang nawong makita sa atubangan sa maong sinsiyo.
Ang bag-ong mga sinsiyo hinimo sa nickel-plated steel diin gi-enhance ang security features gamit ang bag-ong teknolohiya pinaagi sa minting aron dili ma-counterfeit.
Sa bag-ong mga sinsiyo, makita ang bag-ong logo sa BSP, tulo ka mga bayani nga sila si Jose Rizal, Apolinario Mabini ug Bonifacio, talagsaon nga mga buwak, ang tulo ka bituon ug usa ka adlaw, ang gi-capital nga mga letra nga “Republika ng Pilipinas”, mga giringgiring sa isig ka kilid, year mark, mint mark, ug microprint.
Sa kasamtangan, matod niya, ang bag-ong mga sinsiyo dungan sa sirkulasyon sa karaan nga mga sinsiyo diin wa pay tagal kon kanus-a ilisan ang mga karaan.
Si Sumbi niingon nga nakiglambigit sila sa mga local government unit, mga eskwelahan ug kabarangayan aron ipahibawo ang kasayuran bahin sa bag-ong mga sinsiyo ug ang kalahian sa matag usa. (SCG)