NAGLIBOG si Gobernador Hilario Davide III kon nganong gipugos pagpagawas sa Philippine Drug Enforcement Agency (PDEA) ang barangay narco list, diin tulo ka mga Sugbuanon ang nalakip, ilabi nga way kaso nga napasaka batok kanila ug di usab updated ang maong lista.
Alang ni Davide, daw sa way bili ang maong lista kay dunay nalakip nga di iay magpapili sa umaabot nga eleksiyon, nga mao unta unang tumong nga di pabotaran.
Giingong “validated” sa tulo ka managlahing ahensiya sa gobiyerno ang unod sa barangay narco list nga giluwatan sa PDEA niadtong Lunes.
Una nang gikataho nga tumong sa pagpagawas sa lista ang pagpahibalo sa publiko, ilabi na sa mga botante sa umaabot nga piniliay, nga di suportahan ang mga nalakip sa narco list. Apan ang tulo nga nalakip dinhi sa Sugbo, puros dili na magpapili sa barangay ug SK elections sa Mayo 14.
Di direkta nga kaila ni Davide ang mga personalidad sa Sugbo nga nalakip sa lista.
Si kanhi Suba, Danao brgy. Captain Ramonette Durano ug kanhi Lagtang, Talisay brgy. captain Mark Ferdinand Bas igo lang niyang gikahimamat sa kampaniya niadtong 2013.
Di usab siya pamilyar kang Ronda Councilor Bibiano Cabaron, nga kanhi kapitan sa brgy. Palanas, Ronda.
Nahadlok
Si Talisay City Councilor Arturo Bas nabalaka sa kinabuhi sa iyang anak nga si Mark Ferdinand.
Matod sa amahan nga nakugang ug nahadlok siya dihang nakadungog nga ang iyang anak nalakip sa listahan sa PDEA nga gibutyag ngadto sa publiko.
“Nahibulong lang ko nganong naapil siya. Kon drug lord pa na siya, pwerteng datoa na ana niya ron. Kaso, kami man ganing mga ginikanan ang nagpaeskwela sa iyang mga anak. Bisag bawon, kami pay mohatag,” nagkanayon si Konsehal Bas sa interbyu sa SunStar Cebu.
Si Danao City Mayor Ramon “Nito” Durano III nikwestyon usab sa detalye sa listahan sa PDEA ug Department of Interior and Local Government (DILG).
Ang listahan nagngalan kang Ramonette Durano, kanhi barangay kapitan sa Suba, Danao City ug kanhi information officer sa siyudad.
Ang ngan sa kanhi barangay kapitan mao si Ramonette Cynthia Durano Mahinay.
Ang anak sa mayor, Kong. Ramon “Red” Durano VI, niluwat og pamahayag nga nag-awhag sa lokal nga pagsusi sa listahan.
Kon dunay laing lista nga gihuptan ang PDEA, nagtuo si Davide nga angay di na lang kini ipagawas kon di updated ug kon wa pa makiha ang mga personalidad nga nalakip niini.
Modaghan
Samtang ang PDEA 7 nipahibawo nga sa sunod nga listahan nga ipublikar sa ilang ulohang buhatan, dako ang posibilidad nga aduna nay mga kasamtangang kapitan ug mga barangay opisyal sa syudad sa Sugbo nga maapil.
Matod ni Leia Albiar, information officer sa PDEA 7, nga sa pagkakaron, adunay 274 pa ka mga ngan ang naa pa sa ilang national headquarters nga gipaubos pa sa validation.
Ang listahan nalakip na sa giingong kapin sa 20 ka mga personalidad nga ni-file sa ilang kandidatura sa Comelec nga magpapili sa eleksyon sa Mayo 14.
“Naay nangutana nganong tulo ra man sa Cebu. Ilang gi expect daghan. If inyong ma recall nga naa tay gi monitor nga ni file sa ilang COC naa pa tay 274 nga under validation, karong gi release dili pato kompleto,” matod ni Albiar.