NAKA-IPSOT ang Cleveland Cavaliers agi sa 113-112 kulbahinam nga daug sa overtime aron unhan ang Toronto Raptors sa Game one sa ilang best-of-seven NBA eastern conference semifinal Miyerkules sa Air Canada Center, balwarte sa Raptors.
Nibida og ayo si Lebron James sa Cavaliers agi pagtala og triple-double nga adunay 26 puntos, 13 assists ug 11 rebounds, samtang nihatag sab si JR Smith og 20.
Dako sab og abag si Kyle Korver nga anaay 19 puntos, samtang si Tristan Thompson nibira og 14 puntos ug 12 rebounds.
Naunhan sa Raptors ang Cavaliers agi sa 33-19 nga labaw paghuman sa first quarter.
Apan, bangis nikamang ang Cavs human maputol nila ang biya ngadto sa tulo nalang paghuman sa first half, 57-60.
Nagdikita dayon ang ilang panagsangka sa nabilin nga kanto ug napugos ngadto sa overtime sa 105-tanan.
Pag-abri sa extension, natagamtaman sa Cavaliers ang unang tilaw sa labaw human gipalumos ni Korver ang tres, 108-105.
Paglabaw sa Cavs og usa ka punto, naay tsansa modaug ang Raptors sa tres segundos nabilin apan nasipyat ang three-point shot ni Fred Vanvleet hinungdan nahatag sa Cleveland ang kadaogan.