GITUOHANG dili ang sweldo ang rason nganong pipila ka mga batan-on wala nag-interes sa pagpapili sa Sangguniang Kabataan (SK).
Sa Misamis Oriental, dunay 57 ka mga barangay nga nagkulang og kandidato pagka SK kagawad, samtang unom sab ka barangay ang wala gyud kandidato.
"Sa tinoud lang dinhi sa ato sa Misamis Oriental, nakasiguro ko nga dili kana mao ang rason sa mga batan-on," kini ang pahayag ni Allyn Peñalosa, head sa Provincial Youth Development Office sa Misamis Oriental.
Matud niini nga sa iyang paglibot suroy sa mga barangay sa Misamis Oriental, iyang naabi-abi ang mga batan-on ug sagad sa panagtigom, iyang mabati ug madungog kon unsa ka aktibo ug unsa kadako ang kaikag sa mga batan-on nga molambigit sa kaihokan sa ilang kabarangayan.
"It saddened us nga wala nakumpleto ang mga nagpapili sa SK kagawad. Posible nga sa sige og ka postpone sa atong SK election ang atong mga batan-on pakahinayak sa ilang mga buluhaton sama sa uban nga ga summer, ga summer job, galangyaw sa laing dapit aron magbakasyon ug manarbaho."
Gani, panahon sa mga tigom nga iyang gahimoun sa kabatan-onan, kasagaran sa ilang mga reaksyon kon aduna ba gyod diay eleksyon.
"Short lang kaayo ang notice sa pagpahibalo kon naa bay eleksyon ug wala ug gani hangtod karon panahona, duna gihapon mga batan-on gapangutana kon sure ba lagi nga madayon ang eleksyon kay aduna pa silay pagduha-duha," matud ni Peñalosa.
Basi sa iyang pagtuki sa maong mga barangay, iyang nakumpirma nga sagad niini anaa sa hinterland area.
Gipaabot sab niini nga dunay uban barangay gamay lang kaayo ang mga botante nga mga batan-on.
Sa pagkakaron, aduna na silay mga lakang nga gihimo aron maaghat pa sa pakiglambigit ang mga batan-on sa kalihokang barangay.
"In the future, ato siguro pod nang iconsider ilang sweldo kon mauyonan," pahayag ni Peñalosa.
Una na miingon si provincial election Supervisor Carlito Ravelo nga sa SK Reform Act ang 10 porsiyento nga budget nga alang sa SK isugyot nga lakipan sa honorarium ang mga kabataan nga napili nga Kagawad.
"Sa ato man gud karon, ang mapili nga SK chairman lang ang dunay honorarium ug kining mga kagawad wala gyod," nutyag ni Ravelo sa uwahing paghinabi sa SunStar SuperBalita.