MAKABUNGOG ang mga rekorida, motorkada ug uban pang diskarte pagsugod sa kampanya gahapon alang sa SK ug barangay elections.
Ang mga campaign jingle naglagubo. Mga sikat nga sonata nga giilisan og mga linya pagpahaum sa katuyoan sa mga kandidato nganong sila ang iboto karong eleksiyon.
Mga campaign materials namungingi bisan asang dapita. Timailhan kini nga dakong buhi ang demokrasya. Katungod ug kagawasan pagpadayag sa ilang mga plataporma ug sentemento labot sa mga isyu sa mga barangay diin sila gustong moserbisyo.
Isyu
Ang mga pilionon ilabi na kadtong naghugpong ug usa ka grupo dunay tagsa tagsa ka tahas unsa nga isyu ang ilang tukion atol sa mga pulong pulong nga pasiugdahan.
Dunay motuki sa isyu sa kalinaw ug kahusay nga maglakip sa hilisgutanan mahitungod sa kampanya batok sa iligal nga drugas. Kini lang daan nga isyu puwerting haita.
Hait pa ni sa suwab sa sundang sa karnehan. Matag pulong nga litukon sa kandidato makapanlimbawot sa balahbo labi na kon maghisgut og personalidad diha sa barangay. Di ko moingon nga paglikay sa kasamok likayan pagtuki ning maong isyu.
Unsaon nga panahon man sa kampanya basin dunay ubang mamumulong nga di kapugong sa iyang gibati, malitok ang hait nga mga pulong nga sarang makapasagmuyo sa hingtungdan ug sa ilang mga dumadapig. Basin mao ni maghaling og kasakit ug kaligutgut.
Bisan gani kanang isyu sa fiscal management kun kuwarta sa barangay. Giunsa pag gasto ug unsay gigastohan seryoso na nga isyu nga kanunay’ng gibantayan sa mga kandidato ma-incumbent man o di.
Ang ubang kandidato gitahasan siguro pagtuki sa isyu sa panglawas. Unyag pabuhagay sa mga programa mahisgutan ang pagpamalit ug tambal uban ang pasangil sa over pricing.
Apil na ang pasangil sa pagpatuman sa ubang proyekto nga gidudahang may nakasapi tungod sa gitawag nga S-O-P kun standard operating procedure nga pagya kaayo sa mga transaction sa gobyerno. Ang mga kaatbang nga kandidato nga makadungog sa mga pasangil di gyud gustong magpaka hilum.
Motubag ug manghagit pa gani og debati. Hinuon may mga kandidato nga inay manaway mopresentar sa ilang mga plataporma basi sa ilang gituhoan nga makatabang pagpa lambo sa ilang barangay.
Pananglit ang isyu labot sa hinay hinay nga pagbahar sa pressure sa tubig sa nagka daiyang tinubdan. Ang isyu sa mga sitio nga kanunayng nameligro sa higayon nga dunay alarma sa sunog.
Drainage project, malnutrition, ka kuwang sa trabaho, edukasyon, demolition sa mga informal settlers, isyu sa kababayen-an ug kabataan, pornograpiya, child abuse, child labor ug daghan nga nas nagkinahanglan ug pagtagad kay sa mga personal nga ataki.