KAHIBALO ka ba nga ang Pilipinas mao na lay nahabiling nasod sa tibuok kalibutan, gawas sa Vatican City, nga nagpabiling iligal hangtod karon ang diborsyo?
Kita ra say nasod sa Asia nga Katoliko. Gani 80% nato mga Romano Katoliko maong di ika-hibulong nga daghan ang mo babag kay lagi kuno anti-marriage ug anti-family maong subidahon ang pagpasar niini.
Ang resulta, mag puyo-puyo na lang aron malikayan ang gasto sa kasal ug sarang ka mahal ug dugay nga proseso sa annulment kon di makalahutay sa kinabuhing minyo.
Tungod ini, misaka sab ang gidaghanon sa mga pina-angkan ug mga anak sa gawas. Ang lantarang pagpanapaw sa mga minyo murag nahimo na sab nga normal.
Sa artikulo nga sinuwat ni Aurora Almendral, mismo si House Speaker Pantaleon Alvarez, nga mi co-author ining balaora, miingon nga ang pag mentinar og mistress nahimo nga ‘bread and butter’ sa mga politiko. Siya mismo mi-angkon nga duna siyay unom ka anak sa gawas ug duha sa iyang asawa.
Para mahatagan og hustisya iyang binuhatan, nagpa convert siya sa indigenous Manobo Tribe nga exempted sa balaod sa kaminyuon. Duna sab koy laing abogado nga higala nga nagpa convert og Muslim dihang misabak iyang kabit kay tugutan man sa ilang Shariah Law ang diborsyo.
Ang uban nga dunay sapi ug maka agwanta paghuwat sa tinuig nga proseso, maka-eskapo sa higot sa kaminyuon pina-agi sa annulment sama ni Pres. Rodrigo Duterte nga kansang kaminyuon na annul niadtong 1998.
Ang pangutana, mag unsa na man lang ang nahabiling kapares nga gibiyaan, gi-abandonar, gi-abusuhan, gisapawan ug gikalimtan na sa dayon nga hangtod karon way kagawasan ug nag-antos sa abusadong relasyon ug patay nga kaminyuon tungod kay way kapaninguhaan, kahimanan ug kasarang ika-gasto?
Nagkinto, naglalis ug nagduha-duha pa hangtod karon ang mga magbabalaod pag-pasar ining subidahong balaod samtang way puas nga naghuwat ug nagpa-abot ang uban nga nanghinaot mapasar aron ma-ibtan sa tunok sa dughan ug kuros nga gipas-an.