MIPALAG si Angeline Quinto sa akusasyon kaniya sa pipila ka Popsters, tawag sa fans ni Sarah Geronimo, nga adunay video nga gikatap nga daw gikataw-an nila ni Morisette Amon ang pag break down sa Pop Star Princess nga si Sarah Geronimo atol sa concert niini sa Las Vegas, Nevada ang “This 15 Me”
Gitawag matud pa nga “pabebe” ang Popstar Princess.
Tungod niini, sunod-sunod ang tweets ni Angeline niadtong Huwebes aron ilimod ang akusasyon batok kaniya.
Matud sa Kapamilya singer, taas ang respeto niya kang Sarah ug sa mga tagasuporta niini hinungdan nga dili nila mabuhat ang mga pasangil nga gilabay ngadto nila.
Mihangyo sab si Angeline nga ipagawas ang video ug i-atubang ang staff member sa Asap nga nakakita kanila ni Morisette nga gikataw-an si Sarah.
"Nakikiusap ako, ilabas niyo ang video, iharap niyo sa akin ang taong sinasabi niyo na staff ng ABS-CBN nakikiusap ako sa inyo Popsters. Ngayon lang ako makikiusap sa inyo," tweet ni Angeline.
Dugang pa ni Angeline, imposibleng mahitabo ang ginapasangil kanila ni Morisette tungod nahibal-an lang niya ang mahitungod sa paghilak ni Sarah niadtong Lunes, April 30, usa ka adlaw pagkahuman sa Asap episode diin nakuhaan sila sa giingog video.
Bisan og sakit alang kang Angeline ang mga pasangil batok niya apan iya gihapon nga girespeto ang mga supporters ni Sarah.