"WE WERE created with a vocation to work," ang hamubo apan undanon nga mensahe ni Pope Francis ngadto sa katawhan sa Diyos.
Human gilalang sa Diyos ang tawo, ang lalaki ug ang babaye sama sa Iyang kaugalingong "dagway ug kasamahan" (Genesis 1:27), Ug gipanalanginan sila sa Diyos nga nag-ingon, "Panganak kamo'g daghan ug lukpa ang kalibutan sa inyong mga liwat ug dumalaha ang kalibutan.
Kamoy magbuot sa mga isda ug sa mga langgam ug sa tanang ihalas nga mananap," (Genesis 1:28).
Pinaagi sa lamdag niining Daang Kasabutan, ang bokasyon sa pagtrabaho maoy pinakaunang misyon nga gihatag sa Diyos ngadto sa matag tawo dinhi sa kalibutan. Kay diha sa atong pagtrabaho, nakatabang kita uban sa Diyos diha sa pagtukod og usa ka tawhanong katilingban nga puno sa hustisya ug gugma.
Sa sinugdanan pa lamang, gipahimutang sa Diyos ang atong giila nga unang mga ginikanan sa kasaysayan didto sa Hardin sa Eden aron "maoy mag-atiman ug magbantay niini," (Genesis 2:15), apan nisupak sila ug nakabuhat og sala (original sin).
Gipahimangnoan sab kita ni San Pablo nga ang pagtrabaho maoy pinakaunang sugo sa Diyos. Matud pa niya, "Kay samtang diha pa kami uban kaninyo, giingnan namo kamo, 'Ayaw pakan-a ang dili motrabaho'," 2 Tesalonica 3:10).
Kay diha sa atong pagtrabaho, sa opisina o sa balay man, nakapalambo kita ug nakahatag og igong pagtagad sa kinaiyahan. Kay kini pitik ug kabahin lamang sa dako ug lapad nga plano sa Diyos.
Nakatabang kita, pinaagi niini, aron ang kalibutan karon makabaton og tinuod nga responsibilidad ug mapabalik ang diwa sa usa ka hardin diin mapadayon pagpalambo ang kinabuhi.
Sa pikas bahin, sa pagsaulog sa kapistahan ni Saint Joseph the Worker, si Cardinal Luis Antonio Tagle sa Manila nanawagan sa atong mga lideres sa kagamhanan aron sa paghimo og mga polisiya ug balaod aron maprotektahan ug mapanalipdan ang dignidad sa trabaho ug ang katungod sa mga mamumuo.
"By policies that promote a more inclusive, responsible and equitable society, we can overcome obstacles and transform our world of work into one that is grounded on social justice, respect and love," ang panawagan ni Cardinal Tagle.
Gipasabot ni Cardinal Tagle nga ang pagtrabaho mas labaw pa kay sa ubang butang dili alang sa pagtigum og salapi kon dili giunsa nimo pag-ambit diha sa mamugnaong plano sa Diyos.
Matud pa ni Cardinal Tagle nga ang "Genuine working conditions are fostered not simply by transactions but by a covenant relationship between partners who respect and protect everyone's dignity," dugang pa niya "In a covenant relationship there is no room for exploitation."
Atong iampo kanunay sa Diyos nga unta ang mga mamumuo sa tibuok nasud ug kalibutan magbaton sa ilang bokasyon sa pagtrabaho isip dagway sa Diyos ug magpabiling makugihon ug malahutayon alang sa mapadayunong paglambo ug pagprotekta sa katungod ug dignidad sa pagtrabaho. Hinaut pa unta.
(Comment /feedback-09109006290)